Güei, 18 de febreru, entama’l Crowdfunding de “¿Cuála ye?”, el xuegu d’entrugues y respuestes. Ésti ye’l primer xuegu de mesa n’asturianu p’adultos y failu Acuto Xuegos. Félix Fernández, el so responsable y creador, desplicárenos yá lo que yera nesta entrevista. El preciu de salida ye de 40 € con recoyida y 45€ con unviu a casa. Sicasí, hai un descuentu especial pa les persones que participen nes primeres 48 hores.
¿Cómo ye “¿Cuála ye?”?
“¿Cuála ye?” estructúrase del mesmu mou que la mayoría de xuegos de preguntes y respuestes, esto ye, en categoríes estremaes que tienen caúna un color. D’un mou asemeyáu a lo que podría asoceder col Trivial. Estes estayes o categoríes del xuegu son: Historia, Cultura, Llingua y Lliteratura, Xeografía y Conceyos, Ciencia y Naturaleza y Deportes y Entretenimientu.
Los responsables d’Acuto Xuegos ponen tamién un exemplu d’una de les munchísimes tarxetes que va tener el xuegu.
Pero la creación d’esti xuegu nun ye una xera individual, sinón coleutiva. N’Acuto Xuegos dicen que quixeron cuntar con persones con fondos conocimientos en dellos ámbetos sobre Asturies. D’esti mou, collaboraron a la hora de facer les preguntes: Bertu Ordiales, biólogu y escritor, autor de llibros sobre naturaleza asturiana; Bertu Peña, etnógrafu, illustrador y historiador, autor d’incontables estudios y llibros sobre la cultura asturiana; Dani García de la Cuesta, músicu y investigador de la música asturiana; Laura Marcos, profesora, escritora y crítica lliteraria; Julio González Trabanco, filólogu y llibreru; Rafa R. Valdés, historiador, investigador y especialista en llingua asturiana; Rubén Magadán Cosío, historiador ya investigador; Victor Suárez, profesor y activista, ún de los que puxa pola Wikipedia n’asturianu; SEMA, Sociedá Etnomotora Asturiana, entidá que tien estudiao con fondura’l xuegu y deporte asturianu.
Dir al crowdfunding: Calcando equí.
