Güei a les 18:00, nel espaciu de Cuatro Gotes Producciones (Xixón), entrégase a Aique Fernandi el II Premiu Radagast de Lliteratura Fantástica, Ciencia Ficción y Terror pola novela La vieya, na que trata la mitoloxía asturiana d’una manera adulta y con toques d’horror. Aique Fernandi ye profesor de secundaria, traductor y escritor, y yá tien abondes obres publicaes, como son exemplos Lin quier esnalar o la ganadora del XI Premiu Maria Josefa Canellada, Invisible
El xuráu qu’escoyó la obra (ente cuatro candidates) taba compuestu pol escritor Dolfo Camilo Díaz, el traductor Víctor Suárez y la ganadora del I Premiu cola obra Trovadoresca, Blanca Fernández Quintana.
El Premiu Radagast ye l’únicu a la lliteratura asturiana que ye d’iniciativa privada, y consiste en trescientos euros y la publicación de la obra, que yá ta a la venta en llibreríes y na páxina web de Radagast (que vos dexamos calcando equí).
Amás, nesti actu de presentación va anunciase tamién cuála foi la obra que ganó’l III Premiu, de la que yá se tien veredictu y que va espublizase l’añu viniente.
