Dende va tiempu, a la hora de falar de videoxuegos úsense unes categoríes predeterminaes pa dir clasificándolos a toos nun sitiu o n’otru. Como asocede coles noveles o coles películes, falamos de clasificaciones temátiques anque más que pol tema que traten, nel mundu de los videoxuegos eso suel facese en rellación a la dinámica del xuegu y a les propies mecániques más qu’a la temática. Por eso, en xeneral falamos de videoxuegos FPS, d’estratexa, de simulación, d'”estilu GTA” (sí, hai xuegos que fixeron buelga abondo pa crear una propia categoría), de xestión, d’aventura gráfica… etc.
Pero dacuando hai xuegos que salen dafechu de les “normes” y acaben creando un estilu propiu o, meyor, un estilu que ta a mediu camín ente otros. Nesti artículu quiximos facer una esbilla de los que mos paecieron más interesantes de toos y les razones poles que son unos xuegos interesantes pa xugar.
L.A. Noire: Aición y Investigación xuntes
Si xugastis al GTA L.A. Noire nun paez mui estremao: vais en coche pela ciudá (per una ciudá de mundu abiertu), lleváis armes, podéis dir a combates colos malos… Paecería que ye lo mesmo que’l GTA pero dende’l puntu de vista de la policía. Sicasí, nesti xuegu nun tenéis solo que facer estes coses “d’aición”; sinón que, amás, vais dir resolviendo casos estremaos, faciendo entrugues, atropando pruebes y aldovinando si la persona a la que-y tais faciendo entrugues ta mintiéndovos o non.
Amás, lleváis una llibretina na que vais dir apuntando les coses que veis, les pruebes qu’atrpáis, les declaraciones de cada testigu y vais poder tener una trescripción de toles converaciones. Cola ayuda de too eso, vais poder dir descubriendo los crímenes y saber qué pasó realmente. Como veis nun ye nin un GTA-Like (anque ye de Rockstar) nin tampoco una aventura gráfica, sinón que tien elementos de los dos. Amás, pola ambientación en Los Angeles en 1947 con esa música tan guapa (dalgún tema en común con Fallout tienlu) y esos coches d’época paga muncho la pena.
Spore: Xuega a ser dios, un animal que caza o’l Presidente d’un país
Hai xuegos d’estrarexa de lo que se llamen les 4S: Esplorar, Espandise, Esplotar, Esterminar; como pue ser, por casu, el Civilization. Nellos llevamos una civilización o país dende tar “en bragues” hasta un desendolcu científicu y militar impresionante. Spore va nesa llinia pero apórtanos munchísimo más. Nesti xuegu la primer fase somos una célula que debemos dir comiendo otres célules pa sacar más puntos (no que paez un xuegu mui arcade). En pasando esta fase de célula, la nuesa célula acaba convertiéndose nun organismu pluricelular y entós somos un “animal” (animal que podemos diseñar, como diseñamos les persones nel Sims). Esti animal va dir comiendo a otros o faciendo coses pa tener esperiencia hasta que pasa a la fase de tribu, de la de tribu pásase a la de civilización (que ye asemeyada a la del xuegu Civilization) y d’esta pásase a una fase estelar na que la nuesa raza, que yá ye hexemónica nel so planeta, acaba espandiéndose pelos demás.
Lo que llama l’atención de Spore, amás de les similitúes que tien colos xuegos 4S; ye la capacidá que tien de crear bichos de lo más estremao que van dende páxaros hasta cualquier monstruu que seyáis quién a imaxinar. Un xuegu creativu como’l que más y que ye afayadizu tanto pa xente adulto como pa neños.
Portal 1 y 2: Un xuegu de lóxica en 3D
Hasta que ñació Portal, tábemos avezaos a xugar a los xuegos de “puzzle” en 2D. Esti xuegu llévanos a una dinámica perinteresante y propia (que nengún otru xuegu emplegó primero). Somos una persona que tien que se desplazar per estremaes sales o llugares inaccesibles pero tenemos una especie de pistola que pue disparar dos “portales” y si entramos per ún, podemos salir pel otru. El xuegu nun dexa de ser un xuegu de lóxica en gran midida, pero lleva la lóxica a la primera persona y plantega la posibilidá de crear portales, lo que fai que seya un títulu innovador que poco o nada tien que ver colos demás.
Pokémon
Al videoxuegu Pokémon (a cualquiera d’ellos) sóbren-y les presentaciones. Dende que vinos a Pikachu y pudimos xugar na game boy a últimos de los 90 y primeros de los 2000 a Pokémon Bermeyu y Pokémon Azul, el xuegu nun aparó y a esos dos xuegos y 150 colos qu’entamó sumáronse-y una montonera más. Lo cierto ye que nengún xuegu primero d’él creó esti xéneru que ye, en sigo mesmo, un xéneru propiu. En parte tien elementos de rol y d’aventura (vamos moviéndonos per un mapa), pero tien tol aspeutu de los pokémon: animales cibernéticos que cueyen nuna pokéball.
Nel xuegu hai aspeutu de xuegu d’aventures como’l viaxe d’un llau a otru, pero tamién aspeutos de formar, entrenar y cuidar a los pokémon. ASpeutos que paez que faen d’él un xuegu competitivu como pue ser, por casu, les ligues pokémon y la posibilidá de lluchar escontra los pokémon d’un collaciu. En xeneral, la suma de toos estos elementos fixo de Pokémon un xuegu qu’inauguró un modelu estremáu.
Dishonored
Si L.A Noire mecía elementos d’aventura gráfica con otros de GTA-like, nel casu de Dishonored atopamos daqué asemeyao. Nun ye Dishonored el primer xuegu de “discreción” qu’esiste, pero sí ye ún de los primeros – si non l’únicu – qu’integra elementos máxicos mui interesantes como son, por exemplu, el poder ocupar el cuerpu d’un enemigu o d’un animal pa dir per sitios pequeños, el poder saltar y aparar el tiempu y una montonera de coses más de lo más interesantes.
Taríemos equí, de cierta manera, nuna situación asemeyada a la de Portal nel sentíu de qu’en munches ocasiones hai qu’emplegar una lóxica asemeyada y calcular lo que mos permiten facer les maxes y fechizos de los que dispón el xugador de cara a poder entrar per sitios vixilaos o estrechos.
¿Qué más xuegos “fuera de lo común conocéis?
