Magar que tien namás diecinueve años, va muncho qu’a Millie Bobby Brown la conocemos nel mundu enteru. Saltó a la fama en 2016 como protagonista de Stranger Things, el buque insinia de Netflix, y dende entós protagonizó otres obres de gran relevancia como les adautaciones a película de les noveles de The Enola Holmes Mysteries (onde ye hermana de Sherlock), o como personaxe del Monsterverse (l’universu de les películes nueves de King Kong y Godzilla) que yá tien salío en dos entregues.
Por embargu, tamién la acompaña la polémica, como foi’l casu de les distintes vegaes nes que defendió’l terraplanismu o, pelo menos, duldó de les pruebes qu’hai de que la Tierra ye redonda. Agora hai qu’amestar otra cuestión, que ye más grave porque nun queda llendada a les sos creyencies personales.
Y ye qu’acaba de salir la que s’anunciaba como la so primer novela, Nineteen Steps, una hestoria basada en fechos reales, no que-y asocedió a la so familia na Segunda Guerra Mundial. El casu ye que, anque na portada sal solo’l so nome, y bien grandón pa que se vea, depués nel interior podemos atopar que tien como “collaboradora” a la escritora veterana Kathleen McGurl. Esta, al respeutive, cuenta que l’actriz y la so família-y mandaron abonda información y munches idees, y depués Millie siguió collaborando dándo-y idees per llamaes de Zoom y mensaxes de WhatsApp. Asina, de manera clara, taríemos falando de que McGurl sedría una “negra” o escritora-pantasma, siendo suyu cuasi tol llabor y nun teniendo Bobby Brown un papel más qu’aneudóticu no que ye’l procesu mesmu d’escritura, siendo lo más relevante’l nome pa la portada.
