Disney+ estrenaba ayeri la serie nueva de Marvel, Secret Invasion, na que Nick Fury (Samuel L. Jackson) vuelve pa enfrentase a los skrulls, una especie d’estraterrestres cambiaformes, ultracuerpos que se tienen infiltrao na sociedá y, cómo non, nel poder. Tamién podemos ver nella a Cobie Smulders, repitiendo’l papel de Maria Hill, asina como a Emilia Clark faciendo d’una de los alieníxenes.
Pel momentu les crítiques nun son nada unánimes; mientres hai quien diz que ye un thriller secu, escuru y adultu de lo más prestosu, de lo meyor que fizo Marvel, otros dicen que ye tibiu, sosu y qu’hasta se nota que Jackson ta como refalfiáu pola fórmula de siempre.
Por embargu, nun ye una reseña lo que venimos a contavos güei, sinón una decisión “creativa” que ta dando muncho que falar en redes… nada bono.
Y ye que les ilustraciones qu’apaecen nos títulos de creitu de la serie son, como pue decatase cualesquiera que tea un poquitín avezáu, feches por una IA xeneradora d’imáxenes. Quiciabes un güeyu hábil podría dicir hasta cuálu ye’l programa, pero eses cares distorsionaes, testures revesoses y formes que nun acaben de casar son inconfundibles. Por supuestu, la polémica vien sobre manera de que les IAs “deprienden” usando imáxenes garraes n’Internet y que nun tán llibres de drechos, lo que produz un enfadu enorme ente los artistes a los que quiten trabayu usando precisamente’l so trabayu pasáu… y empieza a ser común que surdan boicós a quien les usa.
La empresa encargada de los títulos y acreitada por ello, Method Studios, tien de fechu un trabayador que titula como “téunicu n’IA”. Y el direutor de la serie, Ali Selim, reconoz ensin problema que lo sabía: “esto facía parte de la gracia”, respuende a la crítica, polo perturbadoro de les imáxenes que crea la intelixencia artificial y porque, al cabu y al cantu, la serie va de seres non-humanos suplantando humanos.
Esta ye la primer vegada que les imáxenes xeneraes por IA faen parte d’una gran producción, y cuasi paez que nos empobinen per un camín que lleva al acabante estrenar primer episodiu de la sesta temporada de Black Mirror (que reseñemos va trés díes equí). Munchos usuarios de redes sociales llamenten esta decisión de Marvel Studios, y señalen a maraviyoses abertures feches por humanos ente les que s’alcuentren les d’otres series de la compaña, como foi’l casu de Daredevil (anque la producía Netflix).
Dexámosvos delles imáxenes darréu pa que xulguéis vós mesmos, y l’enllaz al vidéu completu de l’abertura calcando equí.
