Güei a les 13:00 escomienza la primer edición de la FEA, acrónimu de la Feria de la Edición Asturiana. Na Plaza de Trascorrales d’Uviéu, cuasi una trentena d’editoriales asturianes (Bajamar Editores, Cambalache, Cicees Editorial, Colectivo Bruxista, Cuatro Gotes, Delallama Editorial, Duermevela, Eikasia, La Fabriquina, Hoja de Lata, Impronta, KRK Ediciones, Ediciones Nieva, Nortegráfico, Pez de Plata, Pintar-Pintar, Radagast, Satori, La Semeya, Servicio de Publicaciones de la Universidad de Oviedo, Sportula, Tinta Chica, Trabe, Trea, Velasco Ediciones y Velocismo Editorial) axúntense hasta’l domingu pa mostrar los sos catálogos nos puestinos, amás d’organizar una riestra d’eventos como sesiones de firmes, presentaciones o meses redondes.
Ente estos actos alcuéntrase, no respeutive a la fantasía y la ficción científica, una presentación, güei mesmu a les 19:15, de la obra nueva d’Abel Martínez, Vikingos 2035, una novela poscapocalíptica que s’ambienta en Ḷḷuarca y de la que nos faló en Refuelgu apocayá (podéis ver la entrevista calcando equí). El sábadu, a les 16:30, va tar Dam Fernández presentando la so novela de fantasía xuvenil El roble azul, y el domingu, a les 16:00, zárrense les presentaciones cola traducción al asturianu d’El xuegu d’Ender, la clásica novela de ficción especulativa d’Orson Scott Card que Xesús González Rato acaba traducir al asturianu.
Dexámosvos, sicasí, con tol calendariu d’eventos. ¡Vémonos ehí!