La gran campaña de publicidá y l’espardimientu en redes yá facíen intuyilo, pero la recaldación en cines de la película de la moñeca Barbie ta rompiendo récores. Con una recaldación de más de cientu sesenta y dos millones namás nos EE.UU. nos primeros díes, ye yá la primer película del añu y tamién la más esitosa de la historia que dirixe una muyer. Ye, tamién, la tercera con más recaldación dende’l pieslle de los cines pol COVID, y supera por bastante a la so competidora, Oppenheimer de Christopher Nolan (ochenta y dos millones nel mercáu “domésticu”, cuasi la metá).
Como nun podía ser d’otra manera, la película ta teniendo crítiques polítiques, y estes van de tolos palos, dende acusaciones de misandria, de woke, de nun ser enforma feminista, de tresfobia y hasta de propaganda comunista china (razón pola que la película se prohibió en Vietnam, yá que’l Mar de China Meridional apaez nun mapina como terrioriu chinu).
Esto, per otru llau, abre la puerta a lo que yá llamen “Mattelversu” y que vos contemos equí; esto ye, la posibilidá de desendolcar milenta películes basaes nos xuguetes de los que la compaña tien la propiedá intelectual, colos que puen crear un universu compartíu al estilu de los de Marvel y DC y de les que yá tienen unes cuantes en marcha. Barbie yera, nesti sentíu, la pina pa entrar a competir nes grandes franquicies del cine.
La película de Greta Gerwig (Lady Bird), protagonizada poles estrelles Margot Robbie y Ryan Gosling, ye una apuesta enorme de Warner Bros., pos tien gastao nella nada menos que cientu cuarenta y cinco millones solo na producción (a lo qu’habría que sumar tola campaña de publicidá, y de la que nun tenemos datos). Nella, en tonu de comedia, cuéntennos cómo Barbie empieza a tener duldes sobre la so vida en Barbieland y decide viaxar al mundu real, col choque qu’eso produz na so mentalidá inocente.
