La fuelga d’actores de Hollywood sigue alantre, y eso supunxo un problema pa qu’estos idearen les sos mázcares de Halloween. Y ye que’l sindicatu SAG-AFTRA tien dexao claro que los actores nun pueden facer promoción de películes de neguna manera, y por ello nun permite que les estrelles s’antroxen como personaxes de les compañíes afectaes. Anunció qu’acción tala se consideraría facer promoción, y por tanto violar les normes del sindicatu.
Yá hubo ciertu escándalu cuando Ryan Reynolds se punxo farrucu y bromió con que tenía ganes de reñer a la so fía si se-y ocurría antroxase de Barbie, pero nun pasó d’unes pallabres que se tomaron como un poco fuera de tonu. Tamién hubo cahondéu nel Saturday Night Live, que criticó lo estricto de les normes. Pero agora que pasó la celebración hai coses más series que tán produciendo protestes. Estes apunten, sobre manera, a l’actriz Megan Fox y al so mozu, el raperu Machine Gun Kelly, porque paez que quixeron provocar a ver qué pasa.
Y ye que non solo apaecieron na gran fiesta de les estrelles vistíos de personaxes de Kill Bill (Gogo Yubari y La Novia), la película de Quentin Tarantino; ye qu, amás, al subir les semeyes a redes dio-yos por etiquetar al SAG-AFTRA na publicación. Dellos miembros del sindicatu criticaron a Fox y afirmaron que l’actriz foi a mancar.
¿Y vós? ¿Qué opináis? ¿Foi Megan Fox una esquirola, una provocadora, o namás quixo facer usu de la so llibertá?
