Acaba d’estrenase la versión nueva de Dall-E, una de les más famoses de les intelixencies artificiales que xeneren imáxenes online. Como nun podía ser d’otra manera, esto xenera polémica, pero sobre manera pasó colos resultaos asoleyaos por Ammaar Reshi, un “contador d’hestories con IA”, que ye como se describe en Twitter (y que tien material publicao d’esta manera, como un llibru infantil ilustráu). Esti, pa mostrar lo increyible de los resultaos de Dall-E 3, muestra cuatro viñetes d’un cómic de Batman creáu col programa “en cinco minutos”, y que pelo menos a primer vista asemeyen viñetes normales, nes qu’inclusive hai testos coherentes bien colocaos nos globos de diálogu.
Por embargu, lluéven-y les crítiques, en parte porque sí que se ven coses rares cuando empieces a fixate, en parte porque puen detectase les “influyencies” de la IA nes diferentes versiones que va faciendo de los personaxes: na primer viñeta tamos claramente énte una imaxe producida con material de la serie Batman ’66, dibuxada por Mike Allred, na segunda cambiamos a una versión de Batman y el Batmobile que son más bien de la serie de dibuxos de los noventa, y nes dos últimes viñetes ye evidente la influyencia de los dibuxos de Brian Bolland en The Killing Joke.
Asina, entemécense’l cachóndeu, los enfados y, tamién, l’ablucamientu, porque los avances tán siendo munchos en mui pocu tiempu. Equí igual nun podríemos falar de los drechos de los autores, porque, como yá se sabe, nes grandes compañes como DC ye habitual que saquen hasta merchandising coles sos obres ensin pidi-yos permisu nin da-yos royalties. Pero, ¿nun tien nada que dicir DC (esto ye, Warner) al respective? Si una empresa milmillonaria empieza colos llitixos, igual tamién empieza a acelarase la lexislación sobre les IAs…
Dexámosvos el polémicu tuit calcando equí (pa que restoléis ente los citaos si vos peta), pero tamién les imáxenes equí embaxo:
