Toriyama Akira (sí, los nomes xaponeses hai que los poner col apellíu primero) ye probablemente l’autor de manga más conocíu n’Occidente, yá qu’él ye l’autor de Dragon Ball. Por embargu, tien bastantes más obres qu’esa (anque nenguna de tantu duramientu), y ente elles podemos alcontrar dalgunes que tamién algamaron della fama, como Dr. Slump o Ginga Patrol Jako, y tampoco podemos escaecer el so llabor en videoxuegos como Dragon Quest o Chrono Trigger.
Güei, sicasí, tenemos de falar d’una de les sos obres menos conocíes, pelo menos per esti llau del mundu, y esta ye Sand Land. Nuna obra del añu 2000, de siete episodios y recopilada nun solu tomu, preséntanos otru mundu bien complexu qu’entemez fantasía y ficción científica d’una manera ablucante. Y ye que l’argumentu va dexavos ablucaos: Nun futuru cercanu nel que l’agua escosa, y que tien unes reminiscencies clares a Mad Max, un paisanu mayor, xérif, empriende la busca d’un llagu llexendariu… y, p’atopalu, pide l’ayuda nada menos qu’a Satán. Esti decide manda-y al fíu, Belcebú, y xuntos van escomenzar esti road trip. Ah, y, por si esto fuera poco, nel camín han enfrentase a un exércitu encabezáu por un cyborg.
Namás l’estilu peculiar de Toriyama podía facer qu’una hestoria tan esparatada funcionare, y ye qu’agora quieren convertila nuna “IP completa”, esto ye, da-y salida per tolos medios posibles. El plan ye saca-y, de momentu, tanto una película, de manes de Studios Sunrise (los de Mobile Suit Gundam) como un videoxuegu (de Bandai Namco).
Pal videoxuegu tovía va haber qu’esperar un poco (dexámosvos l’avance calcando equí) pero güei mesmu estrénase la película en Xapón. Esperamos poder vela equí pronto, pero de momentu dexámosvos tamién col avance (equí). Nun podéis velu y ñegar que tien una pinta tremenda.
