Los mecenes que sofitaron la campaña de crowdfunding del videoxuegu Tiempu de Lleendes, primer CRPG n’asturianu, tienen yá accesu a él.
Tiempu de Lleendes, creáu por Adrián Carbayales per aciu del programa de desendolcu de videoxuegos RPG Maker MV, ponte nel pelleyu de Xandria, una aprendiza de bruxa a la que les circunstancies obliguen a salir del so pueblu, Polazul, pa dir a l’aventura. Tres d’escoyer un tipu de maxa que remanar (aire, fueu, aire o piedra) y un collaciu que la acompañe, habrá enfrentase a abondos desafíos col envís de salvar el mundu de los planes de Zargos, el malváu rei del inframundu. El mundu y los monstruos que lu pueblen tán basaos en parte na mitoloxía asturiana, parte nos RPGs xaponeses, y tol videoxuegu ta tremáu d’un humor qu’entemez el llariegu col de les aventures gráfiques de los años noventa. Depende de les decisiones tomaes a lo llargo del xuegu, la final d’esti va ser distinto, lo qu’a la xunta de los munchos secretos espreganciaos pel mundu y misiones secundaries, van permitir esfrutar de rexugalu.
Masque de momentu’l xuegu ta disponible namás pa los mecenes, pronto van haber posibilidá de compralu en plataformes de distribución dixital. Por embargu, dellos mecenes llevaron delles recompenses esclusives que nun van tar a la venta, como una guía del xugador, un cartelu cola imaxe de portada o, mesmamente, salir nel videoxuegu como personaxe.
Si queréis saber más podéis ver un avance del xuegu, calcando equí, o tamién el gameplay de la demostración que ficieron en Todas Gamers, calcando equí.
