Va unos meses facíemos un reportaxe en Refuelgu sobre toes aquelles persones que, nun siendo asturianes – y dacuando, nun viviendo n’Asturies – tienen interés por deprender la nuesa llingua y acaben deprendiéndola. Güei tamos con Eva Cameán, con una d’eses persones que nun se contentó namás con deprender l’asturianu sinón qu’acabó abriendo un blogue, coles sos correspondientes redes sociales pa esparder la lliteratura asturiana pa neños y adultos.
D’un tiempu a esta parte, tán surdiendo delles iniciatives mui prestoses en términos de crítica lliteratura centraes na lliteratura asturiana. Son el casu de Llar de Llibros d’Aymara González, La Cla Invisible de Diego Solís y Laura Marcos y, tamién, de Clarión Llibros y Xuegos, que remana Eva Cameán y que tien la particularidá de ser l’únicu espaciu centráu na lliteratura asturiana fechu dende fuera d’Asturies.
Defíneste como “Una galega, que vive en Galiza, pero que ta namorada d’Asturies y de la so llingua”. ¿Cómo surdió esi amor? ¿Cómo deprendisti l’asturianu?
Bono, ye una hestoria llarga, pero intento resumila. Entamé a tener contactu con Asturies nel añu 2011-12 al traviés de la que agora ye la mio pareya. Él ye d’Asturies magar vivir en Galicia dende nenu y ye una persona mui sensibilizada colos temes llingüísticos, sociales, culturales… Entamé a conocer xusto nesos meses la llucha de los mineros, a conocer grupos musicales como Spanta la Xente (siendo banda sonora de lo que taba asocediendo), a lleer poemes y rellatos d’escritores tamién rellacionaos cola situación que se estaba viviendo… Y a partir de ehí too foi a más. Fixi los mios primeros viaxes a Asturies, entamé a lleer llibros n’asturianu, a sentir cuasi que un 95% de música solo n’asturianu… etc.
Nel añu 2014 fixi un cursu online básicu con Iniciativa Pol Asturianu, onde Inaciu Galán foi’l mio profe (difícil tenelo meyor…) y ya foi un saltu d’aprendizaxe. Pero al non usalo nunca, y nun practicar nin falando nin escribiendo, escaécesente delles coses. Foi nel añu 2018 cuando m’apunté de nuevu a un cursu online d’Iniciativa pol Asturianu, y cuando decidí abrir el blogue.
¿D’ónde ñaz la idea de facer un blogue de lliteratura asturiana? ¿Qué otros blogues o espacios conoces que traten esti tema?
Como contaba enantes, nel añu 2018 (a finales) mientres facía el cursu d’Asturianu, tuvi claro que tenía que practicar de dalgún xeitu, o si non escaeceríaseme too. Yo nun sirvo pa escribir poesía o rellatos, pero siempres me prestó escribir y anotar coses sobre una de les mios pasiones: la llectura. Yo tenía un blogue en galego, que casi nun usaba, onde falaba de recursos y llibros pa la reciella. Y dixi: por que nun fago esto, pero n’asturianu? Desta manera practico y pongo un granín d’arena pa da-y visibilidá a la llingua asturiana. Asína nació Clarión, en diciembre del 2018. (blogue y redes sociales).
Hai otros blogues y redes perinteresantes, como n’instagram @llardellibros de Aymara González, o los blogues que pa min siempre foron, son y serán una referencia en reseñes y lliteratura, que son los blogues de Pablo Rodríguez Medina. Entamiéntovos que-y echeis un güeyu en concretu a“Lletra menudo”. Cuando entamé a averáme al asturianu, y nun tenía nin perres nin muncha manera de mercar llibros n’asturianu dende Galiza, dedicábame a imprimir tolos artículos qu’escribía y lleelos una y otra vuelta…
¿Paezte qu’hai poco o muncho interés pola lliteratura asturiana?
Paezme que como en todo, queda munchu camín por percorrer. La lliteratura en xeneral nun ye uno de los “sectores” con más interés del mundu, pero yo, dende lo que conozo al traviés d’esta breve caminada, veo que hai muncha xente interesada, muncha xente puxando por ella, y sobre manera, obres que merecen muncho la pena.
¿Cómo ves a la lliteratura asturiana comparada cola gallega?
Voi falar de cantidá, y non de calidá. Por que’n calidá nun habría nada que falar. N’asturies hai autores y obres que como dicía enantes valen muncho la pena. Pero en cantidá si que hai diferencies claro… Tanto en lliteratura infantil, xuvenil como en lliteratura pa xente adulto.
En Galicia, magar ser un sector difícil y castigáu, tenemos muncha variedá. Hai grandes editoriales faciendo un trabayu escelente (como Galaxia, Xerais, Kalandraka…) y un garrapiellu de editoriales más piquiñinas como Bululú, Aira Editorial, Rinoceronte, sushi books, oqo, patas de peixe etc Faciendo un trabayu perbono tanto en lliteratura infantil-xuvenil como en lliteratura d’adultu, con ediciones perguapes, cuidaes, munches novedaes a lo llargo del añu etc
¿Cuál diríes que ye na lliteratura asturiana l’escritor o la escritora más infravaloráu? ¿Por qué?
Ufff… ye una entruga bien difícil. Toos, y nengunu…
Creo que’l sector lliterariu como dicía nun ye un sector que mueva tanta xente como alomeyor la música, el teatru… Ye probable que si garramos a dalgunes persones pela cai, y yos entrugamos por escritores ,que pa la xente que lleemos n’asturianu son escritores de cabecera, nun tengan nin idea de quienes seyan… Pero pasa n’Asturies y en cualquier llugar. Yo quédome con que hai munches/os escritores mozos faciendo coses perguapes, y ye cosa de escargatar un poquitín pa enteranos de les coses prestoses que tenemos de llau ensín sabelo y de sofitalos.
Nel mio blogue tengo una nueva sección que nació n’esta cuarentena nomada “Entrevistes rescamplu” que pretende dar a conocer escritores y xente rellacionao cola lliteratura, los sos trabayos y los sos vezos llectores y a la hora d’escribir.
¿Dalguna obra asturiana que pienses que tendría que tar traducida a venti idiomes?
Si falamos de calidá, difícil dicir un títulu namás. Cada llibru ye pa cada persona daqué diferente. Igual un llibru que yo adoro, otra persona nun-y presta nada. Y por desgracia angüaño la bona calidá d’una obra nun ye garantía de que vaya tener éxitu, hai tantos factores que inflúin… Hai llibros super ventas a nivel mundial, que nun me prestaron nin la mitá que un llibru n’asturianu…
Céntreste sobre manera nes llectures pa rapazos. ¿Paezte qu’hai un interés pola llectura mayor pente los más neños, o ye una cuestión de tener y nun tener tiempu?
Cada vegada hai más variedá na lliteratura infantil, y fáense coses perguapes que nos presten a la xente mayor tamién. Yo trabayo nuna llibrería, y por suerte veo que los neños y neñes consumen muncha lliteratura (sobre manera hasta los 6-7 años). Nós ye lo que más vendemos, más inclusive que lliteratura d’adulto en xeneral. Pero cada llibrería y cada pueblu ye un mundu…
¿Qué te paez lo más interesante de la lliteratura asturiana visto dende fuera?
A min lo que más me presta de la lliteratura asturiana, ye l’aspeutu costumbrista y de da-y presencia a la sociedá, cultura e idiosincrasia d’Asturies en munches obres. Ye daqué que me presta munchu alcontrar nun llibru. Y nel mesmu sen l’humor y la sorna asturiano que-y da un toque particular y únicu.
¿Qué-y faltaría y qué sobraría a la nuesa lliteratura?
Sobrar nunca sobra nada… too suma. Yo creo qu’igual que’n Galiza, pero más acentuáu, falta cubrir el xéneru infantil con ediciones guapes, conteníos prestosos y novedades. Los neños de güei son los adultos de mañana, y hai que ufrí-yos llibros guapos que yos llamen l’atención, interactivos etc
La editorial Pintar-Pintar ta faciéndolo con llibros mui guapos y a baxu preciu, pero paezme que tien que haber tovía más, y sobre manera pa más pequeños (1,2,3,4 años…). Esto tá asocediendo en Galiza con editoriales como les que vos dicía enantes, que tan faciendo coses guapísimes. Pero como siempres, ye una tema de ufierta y demanda. Y ta claro que lo que necesita si o si la lliteratura asturiana, y la llingua asturiana en xeneral, ye lo que toes sabemos, la oficialidá.
¿Cómo ves l’amplitú de temátiques de la lliteratura asturiana? ¿Paezte qu’hai dalgún tema que nun se toque? ¿O dalgún qu’obsesione a los nuesos creadores?
Igual nun hai muncha variedá de lliteratura xuvenil, romántica etc Yo nun lleo muncho este tipu de noveles, y por eso igual nun les conozo, pero por exemplo en Galiza si que tan apareciendo sagues xuveniles como “Ámote Leo” (de Rosa Aneiros) o tornas al galego en ediciones guapes como Harry Potter (editorial Galaxia). Les moces y mozos lleen más de lo que nos parez, y la lliteratura xuvenil a nivel nacional e internacional tien munchu éxitu. Quiciabes falte crear coses nesi sen…
Va poco José Ángel Gayol entrugábase nel so ultimu llibru, el diariu “En Primera Persona” si los escritores asturianos se lleen unos a otros. ¿Paezte que pasa eso? ¿Hai dalgún escritor o escritora que “cree tendencia”?
Dicen que pa poder escribir bien hai que lleer en forma, asina qu’espero que si que se llean unos a otros! Pero nun sabría dicite si hai dalgún que cree más tencia y que usen como inspiración, habría que pregunta-yos… jeje
Como esperta en lliteratura asturiana y muyer… ¿Por qué pienses que los nomes femeninos, anque los hai y son de bona calidá, siguen siendo escasos?
Paezme que sigui siendo un problema social de base, y magar que s’avanzó munchu nesti sen, queda tovía camín que percorrer pa consiguir una sociedá con una igualdá real.
Nun fai tantos años que J.K Rowling , por poner un exemplu perconocíu, tuvo q’aceptar espublizar los sos llibros de Harry Potter coles sos iniciales, evitando poner Joanne (el so nome) por que dicíen que si la xente s’enteraba que taben escritos por una muyer nun tendrían éxitu… Y tamos falando de fae 20 años, non del 1800…
Por suerte cada vegada tenemos más lliteratura de calidá escrita por muyeres, y non solo ocupamos el llugar de la lliteratura romántica y “pa muyeres” que nos calzaron…
