Nun falamos equí, como foi noticia l’añu pasáu, de qu’una cosplayer taiwanesa, Lai Pin-Yu, tomara cargu como congresista. Ye verdá qu’hai semeyes suyes antroxada d’Asuka, pero téunicamente eso nun ye qu’Evangelion entrara en campaña eleutoral.

Evangelion, por si dalgún llector despistáu nun lo sabe, ye ún de los animes más populares de la historia, probablemente’l que más si cuntáremos namás los orixinales, los que nun tán basaos nun manga o nuna novela llixera. El so argumentu, bien raru y quiciabes demasiao metafísicu, ye sobre qu’una serie de creatures xigantes, “ánxeles”, ataca la Tierra nel añu 2000 (l’anime salió en 1995) y a partir d’ehí el mundu cambia pa siempre. La humanidá, tres l’estrozu, crea pa enfrentase a ellos unos robós xigantes, los Evangelion, que namás puen pilotar adolescentes.

La serie contién munchos elementos xudeocristianos (los ánxeles llámense Adam, Lilith…), pero peralteriaos al garralos autores xaponeses, y emburriaos a ello en gran manera polo exóticos que-yos paecen dende’l so puntu de vista. La importancia cultural que l’anime tuvo en tol mundu ye tremenda, y hasta hai una estatua d’un Eva en Sanghai. Nun dexa de sorprender, de toles maneres, que Guillermo Moreno, candidatu a la presidencia d’Arxentina pol partíu (peronista ortodoxu) Principios y Valores, de fuerte componente cristianu, saque un anunciu con una versión paródica del cantar A Cruel Angel’s Thesis, que cualesquiera que tenga visto la serie reconoz como l’abertura d’esta. Llamentablemente, ye probable que nun sepamos nunca l’efeutu de la campaña nos votantes, porque Moreno ta inhabilitáu (por comprar con fondos públicos llaveros, globinos y otres cosuques col lema “Clarín miente”) y lo más seguro ye que la xunta eleutoral impugne la so candidatura primero.

Dexámosvos l’abertura orixinal (calcando equí) y darréu’l vidéu surrealista (equí) pa que podáis opinar por vós mesmos.

Leave a Reply

La to direición de corréu nun va espublizase. Los campos riquíos márquense con *