Evil Dead ye una saga d’eses que tengo grabaes en corazón, quiciabes la que más, desque siendo un guaḥín (y nun sé mui bien cómo) dexáronme alquilar la tercer parte nel videoclub qu daquella había en Cualloto. Esa yera, cierto, la menos sangronienta de toes, más d’estilu hollywoodiense, pero siguía siendo demasiao pa los pocos años que tenía. Recuerdo tamién qu’años depués, en Primero d’ESO un rapaz del mio cursu llevó Evil Dead 2 nun viaxe y dexáron-y ponela nel autobús. Hubo quien se quexó, que vaya cantidá de gochaes y vaya ascu, pero los maestros nun punxeron problema y pudimos vela entera. En cuantes que pudi veles toes nel so orden apropiáu convertíme nun fan como pocos, y la verdá que perdí la cuenta de cuántes vegaes tragué la triloxía entera. Por supuestu, tamién los cómics, el remake más que decente que salió en 2013 y la bastante recién serie de televisión na que volvía Bruce Campbell como Ash, l’héroe más farrucu d’una saga d’horror.
Una saga, per otru llau, que ye bien llamadera por cómo va cambiando de xéneru. La primera yera una película bien amateur, fecha por unos amigos más que nada pa pasalo bien, pero sacantes los medios xostrones colos que la ficieron, yera una película de mieu. Por si nun la vistis, ye d’un grupín d’amigos que se va de vacaciones a una casina rural, cola mala suerte de qu’ellí ta El Necronomicón (el llibru malditu creáu por H.P. Lovecraft). Poner un vinilu nel que lleen cachos del llibru convoca a los demoños, y a partir d’ehí ye too casquería con unos poseyíos tan pasaos de vueltes que clisen Regan en The Exorcist, y que por muncho que fagan los protagonistes nun tienen manera de permatar. Esta, como dicía, tenía un tonu seriu, pero pa la segunda, pela cueta, teníenlo pasao tan bien cola primera que quixeron tresmitir al públicu lo mesmo, y l’escesu de coraes y la sobreactuación convirtiéronla más en comedia. La tercera, Army of Darkness, na que viaxen a la Edá Media, ye más bien una película d’aventures. Pienso que Fede Álvarez fizo mui bien en volver a lo horroroso naquella versión nueva de va yá diez años, y tamién que na serie caltuvieren el tonu de comedia por escesu que tan bien-y vien a Ash.
Esta película nueva del irlandés Lee Cronin sigue los pasos orixinales, los de facer una película de mieu, lo que nun quita qu’haya bien d’escesos, cuasique demasiaos pa quien piense que va ver dalgo serio. A diferencia de les anteriores, esta ye la primera que nun se desendolca nel monte, sinón nun pisu d’un edificiu a puntu de tirar, y tamién la primera con una familia (menores incluyíos) como protagonista, lo que la dota del drama humanu precisu pa que t’importe quién muerre y quien vive. Los dos elementos dan-y un aire fresco polo que nun sabes mui bien pa ónde va tirar la película. Per otru llau, nótase’l ciñu col que se fai la obra, imitando aquellos planos tan propios y reconocibles de Sam Raimi que me llamaron tanto l’atención de pequeñu, y con referencies mui sutiles que nos prestes a los más fans, como delles frases, armes o la mención a qu’esisten trés Necronomicones (faciendo referencia a que’l de les películes orixinales, el de 2013 y esti son distintos, lo que mete toes na mesma continuidá).
Sicasí, esta ye una película dafechu independiente, que funciona mui bien sola anque patine un poco en dalgún detallucu argumental. Y, arriendes d’ello, la so estrena a la xunta de la nueva de Hellraiser (de la que vos falé equí va un mes) traime la esperanza de que tamos entrando nuna dómina nueva del cine d’horror más gore y esparatáu, que llevaba como dos décades apartáu nun requexu pa les películes de presupuestu baxu. La verdá que dambes dos se pasen trés pueblos, y ye dalgo que m’encanta porque me lleven de vuelta a la época de buscar lo más selvaxe qu’había nel videoclub.
Si vos interesa ver en persona qué pinta tien, dexámosvos l’avance equí.
