Tanto ta falándose de The Last of Us que quiero más dexala pa otru momentu, yá me tienen refalfiao de la serie anque tovía nun vi nin un anunciu. Conque, a la busca de qué saliera nuevo, atopé esta serie británica que bien podría paecer de superhéroes, pero que namás lo ye de manera axacente. Y eso que tolos personaxes, menos ún, tienen superpoderes. ¿Y eso cómo ye, ho?
La serie trata d’una moza de venticinco años, Jen, que tien una particularidá: ye la única, pelo menos de la xente que conoz, que nun gocia de superpoderes. Cuasi tol mundu garra ún en cuantes que fai dieciocho años, y los que non nun tarden tampoco demasiao. Pue ser volar, ser superfuerte, o coses enforma más absurdes como cambiar de peñáu nel intre, producir orgasmos o, mesmamente, tener en culu una impresora 3D. Por embargu, Jen nun tien nada. Ye la única que nun ye especial.
Y asina vémosla perdida, como nos sentimos cuasi toos nesti mundu (pos)modernu, ensin saber qué facer cola vida y con tolos demás adelantrándola pela drecha. Y anque esto pue paecer mui triste, resulta que nun lo ye pa nada, porque nos lo presenten too como una especie de comedia fantástico-costumista, con un aire naïf y coloríu que recuerda una barbaridá a les películes de Wes Anderson. Amás, anque Jen ye una protagonista clara, y con bastante maldá que-y vien d’esa frustración, tenemos tamién otros protagonistes qu’ayuden a espoxigar la sensación de tar presenciando dalgo tan inocente como máxico polos pininos que son: la pareya que comparte pisu con ella, el gatu, qu’igual nun ye lo que paez… Formen un coru de personaxes a los que ye imposible nun garrar ciñu nunos pocos minutos y colos que ye cuasi imposible qu’acabe’l capítulu y nun t’asome na cara una sorrisa d’oreya a oreya.
La verdá que nun sé por qué hai tantes ganes de ver apocalipsis horrorosos, cuando en cuenta de ver aquellos podemos quedar maraviyaos con series como esta. Un poco de guapura nun mundu tan asemeyáu al nuesu que, dempués, permítenos ver la realidá cola parte de la so maxa que nos queda nos güeyos.
