El festival lliterariu de referencia de la ficción especulativa d’Avilés, el Celsius 232, yá ta acabante de facer públicu’l programa pa les 5 xornaes de duración. El festival va entamar esti martes 19 de Xunetu y rematar el sábadu 23 y va contar cola participación d’autores asturianos, españoles, europeos y internacionales y figures tan importantes como Joe Abercrombie escritor de la triloxía “La Primer Llei” o ilustradores de fantasía como Charles Vess.
Amás de bien de presentaciones y conferencies, el festival va contar cola proyeición de películes de cine al aire llibre clásiques y más contemporánees como Los Goonies, Onward o la Guerra de los Mundos. Amás d’exhibiciones de Cosplay y d’Esgrima per parte de la Escuela Asturiana d’Esgrima Antigua.
Les nueves lletres asturianes, presentes.
Les nueves lletres asturianes lleguen con más fuercia que nunca. D’esti mou, el martes, que va ser el día nel que más relevancia van tener, vamos poder ver les presentaciones de la ucronía “1809: Cartes de la Revolución de Trubia”, escrita por Andrés Fernández con namás 17 años; la novela ganadora del Premiu Radagast de fantasía, ciencia ficción y terror, “Trovadoresca”, de Blanca Fernández Quintana o la presentación de la versión en castellano de “La Rexenta contra Drácula”, d’Adrián Carbayales. Amás, esi mesmu día va organizase la mesa “Traduciendo al asturianu a grandes maestros del xéneru fantásticu” onde van falar los traductores al asturianu de Tolkien, Robert E. Howard, Stephen King, C.S. Lewis y Lovecraft.
Amás, otros autores asturianos en castellán van tar presentes como Rodolfo Martínez con “La ciudad y Disfraces parecidos a mi piel, de Rodolfo Martínez” o Dam Fernández con “El Roble Azul”.
Puede consultase’l programa completu calcando equí.
