Yá vos contábemos apocayá (equí) que’l míticu xuegu de cartes coleicionables Magic: The Gathering ta pa sacar cartes de la tamién mítica serie de ficción científica Doctor Who, ente otres milenta coles que tán revilvando la franquicia. La más llamadera pa los medios foi de xuru la d’El Señor de los Aniellos, pos incluyía una carta única (del Aniellu Únicu, valga la redundancia) que’l suertudu al que-y tocó vendió al raperu Post Malone por más de dos millones de dólares.
Bien, pos yá cuando falábamos de los mazos de Doctor Who sabíemos de dos de les próximes franquicies n’enanchar el mundu de Magic: Final Fantasy (2025) y Assassin’s Creed (xunetu de 2024). Por embargu, hai una de la que nun sabíemos hasta agora y que va salir primero d’esas: como yá podéis saber pol titular, esta ye la de la saga de videoxuegos Fallout.
Por si sois de los pocos que nun la conocéis, Fallout ye una saga de videoxuegos de rol y aición na qu’hemos encarnar a un sobreviviente a una guerra nuclear, esplorando les ruines de lo que foi’l mundu civilizáu y enfrentándonos a una riestra de monstruos mutantes como cuques xigantes o una especie d’ogros caníbales. La fondura no que son los detalles, ente los que destaca l’ambiente nukepunk (con publicidá y música que recuerden a los de l’América de los años cincuenta), dan-y un toque mui propiu y particular.
Asina, pa la primer metá del añu viniente, anque nun tenemos mes, van salir mazos prediseñaos de Fallout, de los que ye una pena pero nun tenemos tovía imáxenes promocionales. Tamién s’esperen, y foi un anunciu sorpresa, cartes de Jurassic World, ente les que suponemos que podemos esperar, sobre manera, dinosaurios. Y, por supuestu, ente medies, una barbaridá d’espansiones sacaes direutamente de los mundos propios de Magic.
Si queréis más detalles al respeutive, dexámosvos equí‘l vidéu especial del Magic The gathering, 30th Anniversary Panel.
