Va tiempu que vien prediciéndose un desastre nes plataformes de streaming, pos estes taben aumentando ensin parar y faciendo películes y series de más y más presupuestu, hasta ser una cosa dafechu esparatada, col envís de llamar más l’atención sobre les otres. Y mientres que la esistencia de Netflix, cuando taba ella sola, amenorgó enforma la piratería, qu’agora haya tantes canales que ye cuasi imposible pagar toes fai que vuelva a disparase. Mientres qu’en 2013 podíen contase los beneficios d’estes en 23.400 millones de dólares añales, resulta qu’agora (qu’hai munches más) anden pelos 2.600.
Pa combatir esto y, como vos venimos contando, va tiempu que Disney+ ta en procesu de reforma, queriendo dexar de sobreesplotar tanto les grandes franquicies (Marvel y Star Wars) y cediendo les pequeñes a otres canales. Pero nunca ficiera dalgo tan escandaloso como’l recién borráu de Crater, una película del so catálogu que-y costó nada menos que cincuenta millones de dólares, y que queda pa prau menos de dos meses depués d’estrenala. Salió direuta pa la canal, y agora nun hai forma dala de vela de manera llegal. N’Amazon, per otru llau, amiéstense a les crítiques de The Lord of the Rings: The Rings of Power, la que yera la serie más cara de la historia, el fracasu total y absolutu de Citadel, la que tuvo más cerca de desbancala con un costu de ¡doscientos cincuenta millones de dólares! (y que probablemente nun te suena de nada, pero yera d’espíes). HBO, pela so parte, cambió’l nome a HBO Max y agora a Max a seques, nun procesu d’anovamientu que tampoco nun para de borrar programes. Y Netflix, qu’a la desesperada empezó a impidir compartir cuentes (cosa que formalmente nun se dexaba nos términos del contratu, pero a la qu’ellos mesmos afalaben en redes) y solo n’España tien perdío, por ello, dos millones y mediu de soscriptores a lo llargo de lo que va de 2023. A estes, Netflix acaba d’anunciar la cancelación de trés series españoles: Bienvenidos al Edén, Todas las veces que nos enamoramos y Hasta el cielo: La serie.
Bono, y, a too esto, hai qu’amestar les subíes de precios, asina como l’apaición de planes más baratos con anuncios obligatorios incluyíos. Ye bultable qu’había una burbuya de canales de streaming, y agora ver cómo, mui probablemente, va cayer más d’un d’ellos.
