Les canales de televisión preparen les sos gales más espantibles pa la Nueche d’Ánimes, esperando ser a atrayer a los espectadores col espectáculu más horrorosu de toos. Esti ye’l casu de Hulu, canal de streaming norteamericana que nun tenemos per equí, pero que como ye cuasi toa propiedá de Disney ye Disney+ la que nos suel importar les sos coses.
Pa un eventu al que-y tán dando muncha sonadía, el “Huluween” nel que van echar Goosebumps, It: Chapter Two, No One Will Save You o la versión nueva de Hellraiser, una de les coses que tresnaron ye la temporada nueva d’American Horror Stories, que por si nun lo sabéis ye una pondera d’American Horror Story (en singular). Mientres que la serie madre nos contaba una hestoria cada temporada, esta ye una antoloxía que nos cuenta una cada episodiu, al estilu de les antigües The Twilight Zone y otres pol estilu. Bien, pos pa unos díes primero de Halloween, exactamente pal ventiséis d’ochobre, van sacar del tirón nada menos que cuatro episodios d’esta tercer temporada, pa que se puea fartar d’ella a gustu.
Tenemos yá unes sinopsis curties d’ellos, que vos ponemos darréu:
- 3×01, Bestie: Tres la perda de so madre, una moza busca conectar con un misteriousu amigu online.
- 3×02, Daphne: Un aparatu d’intelixencia artificial espoxiga n’unión al so usuariu.
- 3×03, Tapeworm: Una modelu prometedora nun va aparar énte nada na so nagua pol ésitu.
- 3×04, Organ: Una cita a ciegues al traviés d’una app de cites sal mui mal.
Dexámosvos l’avance calcando equí, anque como yá nos tienen avezaos ye más un videoclip qu’otra cosa. Nun hai confirmación, pero tamos ciertos de que n’España va salir en Disney+ talamente como dicíemos al principiu, pos ye la canal que da accesu a les dos series.
Ah, y recordámosvos, yá de pasu, que la docena temporada d’American Horror Story, Delicate, ta yá estrenada.
