La editorial asturiana Ediciones Radagast (conocida por editar el xuegu de rol Depués d’Ochobre), pidió ayeri a tolos creadores n’asturianu, castellán y gallego asturianu que quixeren contribuyir a facer un ebook de baldre pa la cuarentena qu’unviaren les sos obres a la editorial pa poder facer un llibru en formatu ebook que pueda facer más llevaderu’l tiempu de tar enzarraos en casa.
D’esti mou, Radagast cuenta con averar la cultura asturiana nes trés llingües d’Asturies a la xente. La editorial cuenta con sacar el llibru la selmana que vien y pide a tolos creadores qu’unvíen el so “fondu de caxón” a info@edicionesradagast.com. Dende la editorial confirmen que va haber tanto relatos fechos pa la crisis sanitaria como otros d’otres temátiques que nun tienen nada que ver.
