“¿Cuála ye?” pue que nun fore, hasta agora, muncho más qu’una entruga. Sicasí, agora ye’l títulu del nuevu proyeutu d’Acuto Xuegos: Un xuegu de mesa p’adultos que va poner a prueba los nuesos conocimientos n’estayes como la historia, la xeografía, la llingua y la lliteratura o l’ociu… Pa facer posibe’l primer xuegu de mesa d’adultos, va organizase bien ceo un crowdfunding pa sofitalu al que vos podéis apuntar calcando equí.

Proyeutos como ésti faen parte de lo que ye la cultura popular asturiana, una de les estayes que más de llau quedó nes últimes décades y, quiciabes, la gran escaecida del surdimientu cultural. Con una lliteratura y una música d’oru, un teatru n’asturianu más que decente… …paez qu’ellementos d’importancia pa la cultura como los videoxuegos, los xuegos de rol, el cine o los xuegos de mesa acaben por resistísenos. D’estos últimos, de los xuegos de mesa, falamos güei con Félix Fernández, responsable d’Acuto Xuegos que mos cuenta qué tien d’especial “¿Cuála ye?”; un xuegu que nun sal de la nada, sinón que ye yá’l quintu que faen. Si queréis descubrilu, nun vos perder esta entrevista. Y si vos presta, nun dexéis de sofitalu.

¿Cómo se llama’l xuegu que vamos ver?

El xuegu llamáse ‘¿Cuála ye?’ y d’apellíu, por dicilo de dalguna manera, va tener ‘El xuegu de preguntes d’Asturies’.

¿Cuála ye la mecánica?

El xuegu desendólcase no llargu d’un tableru, cada xugador tien una ficha pa movese n’él según vaya sacando nel dau. Gana la persona que respuenda bien a una entruga de cada una de les seiciones pero pa mete-y dinamismu al xuegu va tener partes especiales que lu enguedeyen un poco y anime la competencia ente los xugadores.

¿Parezse a un trivial?

Colos xuegos d’estes carauterístiques por necesidá son asemeyaos pente si. Va tener parecídos al Trivial o al Preguntados, como tamién va tenelos al ‘Ti non es de aquí?’, que ye un xuegu d’entrugues en gallegu, o al ‘Auskalo’, que ye un xuegu d’entrugues n’euskera.

¿Qué preciu va tener?

Tamos tovía pendientes d’unes últimes caxigalines pa zarralu, pero’l preciu va tar na mesma llinia d’estos mesmos xuegos n’otros idiomes como’l gallegu o euskera.

¿Qué recompenses hai pa les persones que sofiten el mecenalgu? ¿Cuándo va tar disponible en tiendes o pa los mecenes?

Amás del ¿Cuála ye? aprovecharemos los xuegos y materiales que ya tenemos fechos n’Acuto pa facer les recompenses. En cuantes al xuegu, tenemos un diseñu sobre’l que tamos trabayando, una dinámica de xuegu bastante avanzada, les collaboraciones de les preguntes van a mui bon ritmu. Na campaña de mecenalgu vamos danos de marxe hasta ochobre pa la entrega pa tener tiempu a facer toles revisiones necesaries pa tener un bon productu contando col tiempu que tarda na imprenta en facelo, pero lo que ye’l xuegu puede dicise que vamos tenelo prácticamente llistu durante’l crowdfunding.

¿Ye difícil facer iniciatives d’estes carauterístiques n’Asturianu?

Una de les difilcultaes qu’alcontramos ye que’l mercáu n’asturianu ye pequeñu y eso lleva a tener que facer tiraes pequeñes y encarez muncho’l preciu por unidá. A eso hai que sumar qu’en dellos ámbetos tovía nun hai nada fecho y el camín facémoslu al andar, nun hai camín y eso da munches posibilidaes pero tamién tien munchos riesgos.

¿Por qué pienses que nun hai nengún tipu d’ayuda pa estes iniciatives?

No que son ayudes económiques pudiera ser qu’en ciertes coses l’Alministración muévase al ritmu que-y marque la sociedá, no que ye ayuda nel ámbetu de l’atención personal de les persones encargaes de los Servicios de Normalización Llingüística namás que podemos dicir coses perbones y ta-yos mui agradecidos. Nel tema económicu seique nun haya ayudes a estes iniciatives porque hasta agora naide les demandó, nun lo sé. Pero per enriba de too ello, Acuto entamó la so actividá n’abril del añu pasáu y plantegámonos dende’l primer momentu facer les coses sin pensar n’ayudes económiques, porque si tuvieramos la nuesa actividá pendiente d’elles a día de güei taríemos esperando por elles y ensin nengún xuegu asoleyáu. Nun quiero dicir con ello que temos escontra les ayudes, nin muncho menos, pero si que pa pensar n’entamar una actividá cuanto menos se cuente con elles y más se trabaye dende’l proyeutu en definir un públicu oxetivu y llegar a él, meyor. Nosotros, más que na necesidá d’ayudes económiques, que tamién, vemos una necesidá de qu’haya una mayor concienciación de consumir n’asturianu y qu’haya más eventos públicos onde los productores en llingua asturiana tengamos una rellación direuta y grande col nuestru públicu.

¿A quién pue gusta-y?

El nuestru enfotu ye que-y guste a tolos asturianos y asturianes. Queremos facer un xuegu que recueya tola riqueza d’Asturies en tolos ámbetos que podamos pensar. Pa la ellaboración de les entrugues tenemos la collaboración de xente mui valido en distintos ámbetos; Bertu Ordiales nel tarrén de la ciencia y la naturaleza, Bertu Peña nal tarrén de la cultura, Dani García de la Cuesta nel tarrén de la música, Laura Marcos nel tarrén de la llingua y la lliteratura, Julio González Trabanco que ye filólogu y llibreru nel tarrén de les artes y la lliteratura, Rubén Magadán como historiador nel tarrén de la historia, Victor Suarez que ye profesor, activista y ún de los que puxa por la Wikipedia n’asturianu nel tarrén de la cultura y les artes, la xente de SEMA (Sociedá Etnomotora Asturiana) nel tarrén de los xuegos y deportes asturianos y otra muncha xente con otres aportaciones, como por exemplu Rafa R. Valdés que nos asesora en munches coses. Yo creo que conseguir volcar tolos conocimientos de toes estes persones nun xuegu de preguntes ye conseguir espeyar muncho conocimientu de tola riqueza histórica, cultural, llingüística, natural d’Asturies nun xuegu qu’amás de pa divertise valga pa deprender.

Les entrugues tienen categoríes como nel Trivial? ¿Pues danos exemplos dalguna entruga del xuegu?

Si, el xuegu tien 6 categoríes que son Historia, Cultura, Llingua y Lliteratura, Ciencies y Naturaleza, Xeografía y Conceyos y Deporte y Ociu. Déxovos trés preguntes, pero les opciones de la rimpuesta, queden pal xuegu: “La mierense Maria Leonor Rubiano morrió nun campu de concentración de l’Alemaña nazi, ¿onde tien una cai col so nome na so alcordanza?”; “¿Qué ser mitolóxicu ye’l que si una persona se lo cruza tien que facer un círculu nel suelu y metese n’él pa que nun-y faiga nada?”; ” ¿Qué escritor norteamericanu de terror mienta a Ḷḷuarca y a la llingua asturiana nel relatu The mound (El túmulu)”.

¿En qué otros proyeutos tais pensando o trabayando?

El tamañu d’un proyeutu como ésti del ¿Cuála ye? y más tovía lleváu a una campaña de crowdfunding ye de tal grandor que tamos práuticamente al 100% dedicaos a él. Tenemos delles idegues pa xuegos infantiles, prestaríanos dir más allá de xuegos de cartes pa neños y esti añu sacar un par de xuegos infantiles, unu cienciellín y otru más ellaboráu, pero primero vamos ver como va’l “¿Cuála ye?” y dempués valorar.

¿Quién tais detrás d’Acuto Xuegos? ¿Por qué vos llanzastis a esta aventura?

Tamos la xente de casa. Ta la mio pareya, toi yo y tán les mios fíes que son les meyores asesores. Sorprendería si desplicara toles cosines que se cambiaron de los xuegos que ficimos hasta agora a propuesta o suxerencia d’elles. Y llanzámonos a ello porque se dieron delles circunstancies nel planu llaboral y personal que nos llevaron a ello. Cuando entamó Reciella vimos munches coses que faltaben nel tarrén infantil n’asturianu y l’añu pasáu, por circunstancies llaborales decidímonos a prebar que tal salía esto de facer xuegos n’asturianu.

¿Qué xuegos tien agora Acuto y qué cifres de ventes tienen?

Tenemos cuatro xuegos infantiles asoleyaos, dos d’ellos escosaos que son el “Rompecabeces de Les Estaciones del Añu” y “el Xuegu de les Pareyes” y tamién tenemos el “Rompecabeces de les Ayalgues Asturianes” y el “Dominó d’Animales d’Asturies”. Del Xuegu de les Pareyes ficimos una versión n’a fala occidental y otra en gallegu a traviés d’un Crowdfunding. En cuantes a les ventes, tamos contentos, puede dicise que tamos salvando los trastos, suponemos que tamos na mesma llinia de ventes qu’un llibru mediu de lliteratura n’asturianu. Tamos deprendiendo tovía pa facer d’esto dalgo viable, pero calteniendo aspiraciones mui cencielles y acertando coles propuestes que faigamos puede ser posible asoleyar unu o dos xuegos al añu.

Falábemos va poco d’Asturies nos videoxuegos, pero vemos que’l mundu de los xuegos de mesa y de los videoxuegos ta bastante muertu de nun ser por vosotros nel primer casu. ¿Qué eches de menos como alternatives d’ociu amás de los xuegos de mesa?

A mi parezme que l’ociu n’asturianu bien plantegáu tien muncho camín que puede percorrer. De la música n’asturianu nada hai que dicir, ta ehí pa ver los resultaos, el teatru, polo menos no infantil que ye no que más cerca toi, cuando se fai bien enllena les sales, ehí ta’l Ciclu Añal de la Factoría n’Avilés o Escecines en Xixón y si los ayuntamientos d’Uviéu, Mieres o Siero, por mentar conceyos grandes, ficieren lo mesmo de xuru que conseguiríen los mesmos resultaos. Na TPA les audiencies parecen demostrar que lo que se fai n’asturianu tien acoyida. Hai munches estayes nes que puede prebase a facer coses, mesmamente nos videoxuegos o’l mundu de les APPs nun hai nada fecho. Yo animaría a quien tenga idegues n’estayes nes que tovía nun hai nada n’asturianu a intentar sacales alantre, siempre con procuru y colos pies en suelu, que lo intente ¿por qué non un crowdfunding pa un vidioxuegu o pa nuevu llargometraxe n’asturianu o pa crear conteníu audiovisual infantil pa internet? Si hai persones con capacidá ya idegues, que s’animen, y collaboremos ente toos al ésitu de toos.

¿Hai dalguna novela o canción asturiana que pueda inspirar un xuegu de mesa, como pasó con Game of Thrones y les adaptaciones al tableru?

Un xuegu de mesa d’estratexa basáu nel xuegu de rol de “Depués d’Ochobre” podría ser una cosa guapa. Asturies ye tan rica n’historia y cultura que trabayando sobre ello pueden salir milenta coses.

¿Va haber manera de mercar el xuegu per internet y recibilu en casa? ¿Tenéis tienda virtual?

Si, tenemos la opción de venta online y unviu en Correos. El mou de venta que tenemos ye contautando con nosotros direutamente, ye la nuestra tienda online particular.

Alcordáivos de que ye posible sofitar “¿Cuála ye?” inscribiéndose na campaña de crowdfunding equí.

Leave a Reply

La to direición de corréu nun va espublizase. Los campos riquíos márquense con *