Ye normal que dalgo que tien cambiao tanto’l mou de vivir de la xente se reflexe en cine y televisión. Y masque nel so momentu nun m’entusiasmó demasiao qu’anunciaren la producción de dalguna de les obres qu’equí vamos mentar, he dicir qu’en viéndoles, yá con un poco de distancia del enzarru de 2020, si ye verdá qu’hai coses bien interesantes de les que falar. ¿Y cuáles? Bono, en xeneral podemos dicir que, pel momentu, les obres qu’entemecen l’andanciu cola ficción especlativa faenlo pa falar de les rellaciones humanes, de la necesidá de contautu físicu, de los héroes anónimos o de la facilidá cola que podemos perder la llibertá. Pero, si vos paez, vamos casu por casu:
Songbird:
Cuasique la película de mayor presupuestu sobre’l tema, contando n’elencu con Demi Moore o Alexandra Daddario. Nella muéstrennos un mundu dafechu camudáu pola mor d’una mutación del covid cola que ye a producir la muerte a namás cuarenta y ocho hores de pillalu. El mayor protagonista (masque ye una película coral) ye ún de los pocos inmunes, a los que se-yos permite salir a la cai y polo que suelen trabayar de mandaderos. Por embargu, la vida d’estos riders nun ye nada cenciella, pos pa selo han refugar tou contautu físicu pola posibilidá de que tengan el virus apegáu a la ropa, el cuerpu o’l pelo. Tamién tenemos ente los personaxes la que ye la so pareya a distancia, un matrimoniu pudiente que se dedica a consiguir pulseres d’inmunidá empara una bona cantidá de perres, una aspirante a actriz que quedó aisllada en Los Ánxeles cuando’l mundu cambió d’esmenu, o un funcionariu públicu despiadáu que s’asegura de caltener l’andaciu controláu… perdiendo la humanidá con ello.
La verdá ye que les crítiques a la película son terribles, quiciabes por llegar primero de dexar les coses aposentar. Pero tamién ye cierto que ye una película entretenida, arriendes de sentar les bases de lo que tien traces de que va ser tou un soxéneru.
The Bite:
Les películes y series de zombis, les más de les vegaes centraes en como s’esparde la enfermedá, nun van poder asemeyase más nunca, nin de broma, a les anteriores a 2020. Y na miniserie The Bite tenemos el primer exemplu d’ello. Esta ye una comedia qu’amiesta los muertos vivientes con una especie de comedia neocostumisma (neo- por falar de les situaciones de la “normalidá nueva”) onde dos vecines bien distintes, una médica y una dominatrix, s’enfrenten a una mutación del covid que fai a la xente convertise en zombi. Magar que l’argumentu suena tremendamente absurdu, y qu’abulta que marafundiaron tol presupuestu en contratar a Taylor Schilling (protagonista d’Orange is the New Black) porque los efeutos especiales dexen bastante que desear, l’elementu fantásticu tamién ye sida equí pa falar de coses bien reales; de los sentimientos provocaos pol enzarru y de tolos trabayadores qu’acostaciaron el pesu de facer la vida soportable a los demás, cosa mui seria pero qu’entra más fácil al contala con humor.
Safer at home:
Resulta llamadero, y tamién ye un niciu de que nos alcontramos énte un soxéneru nuevu, qu’esta película presenta una distopía con un covid perpeligroso y un Estáu autoritariu, pero namás que como tresfondu pa una hestoria que no sustancial nun tien nada que ver con ello. Esta trata d’unos amigos que s’axunten per videoconferencia pa celebrar l’aniversariu d’ún d’ellos, y onde too pintaba que diba ser mui divertío. Pero de sópitu asocede una traxedia, y a partir d’ehí tenemos una especie de thriller, tou él grabáu talamente como si fóremos ún más de los amigos coneutaos y onde les coses van poniéndose más y más fees.
De nueves tenemos equí una película entretenida, que nun ye una xoya del séptimu arte pero que pue vese si nun tienes cosa meyor que facer, y amás de probar que les posibilidaes de la temática son cuasi infinites.
Y de repegón… Corona Zombies:
Ye menester mentala porque ye la primer película qu’entemez el covid cola fantasía; paez increyible, pero estrenáronla n’abril de 2020. Por embargu, la cosa tien trucu, y ye que tamos énte’l reciclaxe d’una película italiana de 1980, que doblan al inglés como-yos peta pa facer chancies sobre’l coronavirus y a la qu’amiesten unes poques imáxenes nueves pa sacar una moza a la busca de papel hixénico. Sinceramente, hai poques películes tan males como esta, y dende equí encamentámoste pa que nin siquier tentes de vela.
