Contábemosvos, va pocos díes (equí), que taben a puntu de salir dos volúmenes nuevos de los clásicos Mortadelo y Filemón, pos anque Ibañez llevaba nada menos que sesenta y cinco años trabayando nellos nun acababa de decidir xubilase. Por embargu, ayeri conocióse la triste noticia pola que yá nun vamos poder tener más historietes d’él.
Barcelonés ñacíu en 1936, en 1952 empezó a compaxinar el so trabayu como botones nun bancu col de collaborar pa delles editoriales de cómic, y en 1957 dexó aquel trabayu pa facer parte de “la segunda xeneración de la Escuela Bruguera”, editorial pa la que creó los sos personaxes más nomaos. Por mentar unos cuantos: Mortadelo y Filemón, El botones Sacarino, Rompetechos, 13, Rue del Percebe, Pepe Gotera y Otilio… En 1969, y influyíu pol cómic franco-belga, creó la primer obra de Mortadelo y Filemón en formatu BD, El sulfato atómico, que foi un ésitu y cambió dafechu la forma d’editar cómic español.
Como tien pasao sobre manera coles editoriales americanes, los personaxes creaos pa Bruguera quedaben en Bruguera, y cuando Ibáñez marchó en 1985 viose obligáu a trabayar con otros personaxes nuevos y enforma menos conocíos. Por embargu, la oportuna Llei de Propiedá Intelectual de 1987 devolvió-ylos primero de que pudieren facer un estrozu. Dende entós siguió trabayando nes sos creaciones, y Mortadelo y Filemón, les más populares, ficiéronse un güecu nos dibuxos animaos, los videoxuegos y el cine, y les historietes traduxéronse y vendiéronse per tol mundu.
A finales de 2020 surdió una plataforma col envís de consiguir el Premiu Princesa d’Asturies pa Ibáñez, cosa que contó col sofitu d’Arturo Pérez-Reverte, Santiago Segura o Iker Jiménez. Una de les campañes llogró l’apoyu de primero trenta y, depués, sesenta y siete eurodiputaos. Tamién hubo quien s’opunxo, criticando que solía tener “negros” retocando y entintando los sos dibuxos y a los que nun reconocía nos creitos, y por eso, o nun sé sabe por qué, al final la cosa quedó pa prau.
