Jason David Frank, actor conocíu sobre manera por interpretar a Tommy Oliver, el Power Ranger con récor d’apaiciones nes series de la franquicia, acabó cola so vida esti 19 de payares.
La fama del actor escomenzó en 1993, cuando s’estrenó’l primer capítulu de Mighty Morphin’ Power Rangers nel que salía como villanu pa llueu convertise nel miembru más carismáticu del equipu: el Power Ranger verde. Más tarde dio vida, na mesma serie, al primer Power Ranger blancu, en Power Rangers Zeo y Power Rangers Turbo foi’l coloráu, y años dempués volvió como’l Power Ranger negru en Power Rangers Dino Thunder.
Amás de siguir saliendo n’episodios sueltos hasta l’añu 2018, asina como interpretando al personaxe en dellos curtios, J.D.F. fundó un dojo nel qu’enseñaba un estilu de llucha, el toso kune do, desendolcáu por él mesmu a partir d’otres artes marciales de les que tenía conocimientu (shōtōkan, wadō-ryū, taekwondo, judo, jiu-jitsu brasileñu, muay thai, wing chun, jeet kune do y aikido), produxo una serie web autobiográfica y participó n’espectáculos de llucha llibre.
Actualmente taba rodando la película Legend of the White Dragon, na que daba vida de nueves a Tommy Oliver, y alcontrábase nun procesu de divorciu de la so segunda muyer.
