El clasiquísimu personaxe de ficción científica ta a puntu de facer noventa años, y, pa celebralo, va volver a les tires de los periódicos nes que ñació. King Features, la que foi la distribuidora de les tires de Phantom, Betty Boop, Mandrake el Magu o Popeye, amás de la mentada, volvió a la carga va un par de domingos con una hestoria por entregues a cargu de Dan Schkade (quien yá traxo de vuelta, tamién, a The Spirit) y que-y da un aire ente clásicu y cartoon de lo más interesante.
Amás d’esto, paez que King Features tien pensao otros proyectos pal personaxe, nueves series de cómics n’asociación cola editorial Mad Cave Studios, y tamién reimpresiones de clásicos. L’envís ye, al empar, llegar a vieyes xeneraciones de fans y afayar otra nueva.
A Flash Gordon, xunto con Phantom y Mandrake, considéraselu ún de los predecesores directos de los superhéroes de cómic, y tien protagonizao historietes, seriales radiofónicos y cinematográficos, series de televisión d’acción real y dibuxos animaos, y recuérdaselu sobre manera pola la famosa película de 1980. Un autor llangreanu, Franco Torre, fízo-y un homenaxe na so segunda novela de Sherlock Holmes, El presunto emperador de Manchuria.
