El grupu Fontoria, compuestu por Pablo Pumarada, Xosé Ramón “Navia”, Nagore Goikolea y Maxi Areñes ta acabante presentar un villancicu col nome de “Nueche d’Avientu” p’amenizar estes fiestes que, a dicir verdá, precisen de más ánimos que cualquier otra de les anteriores.
Esti villancicu surde d’un son que Maxi Areñes tenía en mente dende’l primer discu, Nordés, anque nun escribiría la lletra hasta depués de sacar el segundu discu, El máxicu viaxe de Fionna de Morlay, foi ellí cuando Nueche d’Avientu garró forma anque tardaría en grabase y nun pasaría a ser una pista d’audiu hasta entamar los trabayos pa producir el tercer discu del grupu.
La lletra de Nueche d’Avientu (que ye’l primer villancicu de Fontoria) ye de temática navidiega pero pon a los músicos nel centru: Fala de cómo unos músicos, al enterase de que ñació un neñu nuna casa mui probe, van ellí y sofítenlu colo que pueden.
Un discu grabáu a distancia
El teletrabayu nun ye namás una cosa d’oficinistes. Fontoria sábenlo bien. La so vigulinista, Nagore, vive n’Euskadi y por mor de los zarros perimetrales y les restricciones de COVID tuvo que grabar ella la so pista d’audiu y mandala al estudiu per internet pa que depués pudiere arreglase y inxertase nel discu final.
La opción nun ye la deseada, Maxi Areñes diz que “nun queda otra”, y que “dalgunes coses podemos grabales en persona nel mio estudiu porque de momentu nun mos afecten les zones confinaes”, pero que ye fastidiáu’l tema del harpa, vigulinos y viola de Nagore que tien qu’unviar les pistes. Anque fai chancia d’ello: “yá col anterior trabayu de Fontoria sacamos un “Master” en grabar a distancia, y col míu en solitariu pasó lo mesmo”. Con too, lo más fastidiao pa los grupos ta siendo’l tema de los conciertos.
Sirio, tercer discu de la banda yá de camín
Anque’l mes de setiembre vio la salida d’El máxicu viaxe de Fionna de Morlay, lo cierto ye que’l grupu va a discu per añu. Esti últimu publicáu, el máxicu viaxe, presentáronlu en Piloña y tienen intención de facer xira con él l’añu qu’entra si la situación médico-santiaria nun lo torga. Con too, el grupu nun descansa y anuncia que va salir un tercer discu Sirio na seronda, del que tamién quieren facer presentación.
Esti últimu, Sirio, ye de na llinia del anterior: instrumental llargu con dellos temes. Anque nun ta acabáu y Maxi Areñes dulda que ” nesta ocasión contenga temes vocales”. La duración ye otra de les carauterístiques del grupu, si l’anterior tenía 70, ésti va camín de facer más. “Son discos que pol so tipu de composición, atmósferes, y la so conceptualidá cuntando una hestoria, merécenlo”. El grupu ye optimista y recuerda que se vendieron tolos exemplares de Fontoria y que van facer porque con Sirio se vendan tovía más.
