Cartel de la tercer fola de Formientu en Casa Fest

La plataforma cultural Formientu, que pertenez a Cuarto Gotes, sacó güei el cartel pa la que ye la tercer fase del festival caseru más importante d’Asturies: El #FormientuEnCasaFest. Esti festival de cultura trai una riestra de creadores asturianos de la estaya de la música, la narrativa, la poesía, el teatru y otres muches coses pa fornir con cultura asturiana. El #FormientuEnCasaFest.

Nesta tercer fola vuelven nomes que salieron n’otres como Victor Suárez pero súmense munchos nomes nuevos de creadores de toles estayes culturales. ¿En común? L’espresase en llingua asturiana. El festival entama güei a les 19h cola charra-recital de Solinca Turbón que llerá dellos testos. El día 17 a la mesma hora tará Tante Blanco, perconocíu cantante que foi la voz de Los Berrones, que fadrá un conciertu online en direutu. Al otru día, sábadu 18 habrá doble sesión: 12h00 habrá llectura de mitoloxía asturiana pa la reciella fecha por Helena Trexu y a les 19h el famosísimu músicu tresgresor Rodrigo Cuevas en forma de entrevista-alcuentru. El domingu 19 habrá a les 12h un cuentacuentos de Beatriz Rato y pela tarde Eva Cameán, dende galicia, falarános de la lliteratura asturiana dende’l so blogue Clarión Llibros Y Xuegos.

El llunes 20 d’abril a les 19h tará Milio Ureta con un recital del so poemariu; el Martes a la mesma hora tará Pilar Sánchez Vicente con una charra sobre les muyeres y feminismu. El miércoles 22 repite Víctor Suárez sobre la traducción de La Rexenta al asturianu y les dificultaes qu’atopó. El xueves 23 Gonzalo Llamedo, profesor universitariu, falará d’anovación educativa na universidá. El vienres 24 Ástor Llaneza falará de ciencia y de simbiosis nos seres vivos mientres que’l sábadu 25 habrá sesión a les 12h con un cuentacuentos con Maggy, mientres que pela tarde tará’l blogueru Marcos Salazar falando de cultura asturiana y más alantre, falará Pedro Durán del presente y futuru del audiovisual en llingua asturiana. El llunes 27 d’abril fadrá Aymara González un taller de traducción al asturianu, la traductora tien muncha esperiencia nesti campu que compartirá colos espectadores. El martes 28 Claudia Lueje falará de cómo quitar el mono a la xente que sal muncho al monte mientres el confinamientu. El 29 d’abril dende Llión falará Daniel Guerra sobre la producción cultural en llionés nesti territoriu. El xueves sedrá l’americanu Matthew Stuckwisch que dende los Estaos Xuníos va falanos de la llingua y lliteratura asturiana.

El 1u de Mayu Rubén Bada fadrá un conciertín dende casa. El 2 de mayu Mónica Jimenez falará de muyeres asturianes y pintura esi día a les 19h00. Acabando Mari Luz Pontón el 3 de mayu sobre televisión y escolinos.

Leave a Reply

La to direición de corréu nun va espublizase. Los campos riquíos márquense con *