Nos tiempos de coronavirus y estáu d’alarma, ye preciso quedar en casa y nun salir. El seutor cultural asturianu, consciente de les debilidaes de la programación cultural qu’ufierta la TPA (por dicilo de manera fina, porque la ufierta cultural asturiana de la TPA ye más bien inesistente); presentaba va poco una iniciativa perprestosa: #FormientuEnCasaFest, el primer ciclu cultural dedicáu a la cultura asturiana y que va facese íntegramente pela rede. La cantidá de ponentes mete mieu y desplicábenla Inaciu Galán y Diego Solís nun vídeu que compartieron nes redes sociales.
¿Cuál ye’l programa cultural de #FormientuEnCasaFest?
Miércoles:
Güei miércoles Diego Solís va dar llectura de dellos poemes del so llibru “Cállanos con esa música” na páxina de Facebook de Formientu. Esti llibru, hai que lo recordar, ye’l ganador del Premiu Asturies Xoven de Poesía 2019; ún de los premios más pretixosos qu’hai de les lletres asturianes y de la creación moza.
Xueves 19: Alba Carballo falarános de la obra de María Xosefa canellada y en concreto de Montesín
Vienres 20: A les 19h00, Silvia Quesada, una de les voces más representatives del pop n’asturianu va trayer un momentu musical. De les munchos cantares que tien, el que quiciabes seya’l más famosu de toos seya’l reivindicativu y feminista “La mesma revolución” que vos dexamos equí pa dir abriendo boca.
Sábadu 21: El propiu Inaciu Galán va presentar ún de los sos llibros de los que nun mos faló muncho polo que vamos tener que tar sollertes a lo que mos cuenta.
Domingu 22: Ye’l día en que’l músicu Alfredo González fadrá tanto lliteratura como música. Esti músicu, hai que lo recordar, ganó con “La Nada y tu” el Premiu al meyor cantar en 2009 faciendo qu’esi cantar fore’l que representare a Asturies nel Festival Liet Internacional o, como se-y diz nel mundín de la música, “L’Eurovisión de les llingües minoritaries”. Alfredo González tien bien de temes musicales tanto n’asturianu como en castellán.
Llunes 23: Esti llunes Sergio Buelga de la Compañía Asturiana de Comedies va falar de Telva y Pinón, los perconocíos personaxes d’Alfonso Iglesias, el dibuxante de cómic más conocíu d’Asturies y que tanta influyencia diba tener nos que vinieren depués.
Martes 24: Ye’l turnu de la escritora Raquel F. Menéndez, que va venir falar de les sos últimes llectures y rellectures; polo que pue se interesante escuchar los conseyos de la escritora pa poder escoyer bones compañíes lliteraries pa estos díes de tar enzarraos.
Miércoles 25: Dientro d’una selmana sedrá’l momentu en que Xaime Martínez vaiga venir con una actividá que, según dicen en #FormientuEnCasaFest va ser un poco sorpresa. Xaime Martínez ye conocíu pola so faceta poética tanto n’asturianu como en castellán onde ganó premios d’importancia como’l Premiu Nacional de Poesía Xoven y, tamién, por facer propuestes musicales innovadores como toles que componen l’álbum “Ósculos d’Agua nel imperiu asturianu”, onde podemos ver pieces como ésta:
Xueves 26: Víctor Suárez, ún de los responsables de la Wikipedia n’Asturianu va desplicar cómo podemos emplegar esti tiempu d’andanciu pa poder ameyorar ente toos la wikipedia n’asturianu. Hai que recordar que la wikipedia n’asturianu ye una de les wikipedies más desendolcaes de toes en rellación a la proporción ente falantes del idioma y artículos. Va non muncho perpasó los 100.000 artículos.
Vienres 27: María Llatores va cantar pa tolos espeutadores en #FormientuEnCasaFest. Podéis dir garrando una idea de lo que vais ver y sentir y la potencia de la so voz con esti videu.
Sábadu 28: Maggy, de PlayPresta va facer un cuentacuentos a les 12h00 pa los más mozos de la casa. Pela tarde, Blanca Fernández (Shiroychigo) va falar de cosplay y vais poder face-y entrugues de toa triba sobre esta actividá cultural.
Domingu 29: Vamos poder sentir los primeros temes n’asturianu d’Antón Martínez; un mozu que ta entamando nesto de la música.
Llunes 30: Como l’asturianu nun ye solo una llingua d’Asturies, sinón que ye tamién la nuesa llingua común con Llión y Miranda en Portugal, esti festival va cuntar tamién cola presencia del músicu llionés Fran Allegre.
1 comentariu