Como vos tenemos contao, en Disney tán decatándose de que la sobreesplotación del Universu Marvel y la franquicia de Star Wars nun son tan bona idea como pensaben, pos tantes series y películes faen perder l’impautu de caúna d’elles y lleguen a saturar al públicu. Por embargu, yá qu’estes grandes producciones se preparen con tanta antecedencia, la inercia que llevaben sigue demostrándolo hasta que llegue la frenada.
Esti ye’l casu de Secret Invasion, serie que s’alloñaba un poco de les típiques hestories de superhéroes pa presentanos una hestoria a mediu camín de la ficción científica y el xéneru d’espíes. Nella, Nick Fury (Samuel L. Jackson) enfréntase a una infiltriación de los skrulls, los estraterrestres yá vistos en Captain Marvel y que sedríen dalgo asina como los body snatchers de la compaña. El casu ye que la serie, con un presupuestu de más de doscientos millones de dólares, más de lo que-yos cuesten la mayoría de les películes, güei podemos dicir que foi un absolutu fracasu. De les series de los estudios, l’audiencia de la estrena namás consigue superar la de Ms. Marvel, y les crítiques del sestu y últimu capítulu ruempen récores pembaxo con una nota d’ocho sobre cien, destacando d’él lo confuso que ye, lo poco que resuelve y que fai un exerciciu de retrocontinuidá qu’estropia lo pasao en películes pasaes.
Bob Iger, CEO de Disney, reconoz que “tuvimos delles deceiciones últimamente” y que-yos gustare que dalguna de les últimes estrenes tuviera meyor receición. Mientres, el direutor Ali Selim afirma nuna entrevista pa Variety que nun lleó nenguna reseña, pos el so trabayu acaba al terminar la serie.
A estes crítiques hai qu’amestar, amás, aquelles que vos contemos apocayá (equí) y causaes pol usu de xeneradores d’imáxenes por IA pa l’abertura de la serie, cosa que sorprendió bastante cuando manexen presupuestu talu.
