Rotten Tomatoes ye’l portal de referencia no que son les reseñes de crítica y públicu, onde los medios de comunicación van primero pa saber si una película presta o non a la xente, y qu’amás munchos usen pa decidir qué película dir a ver al cine o escoyer entre l’abondante catálogu en streaming. Por embargu, agora la credibilidá de la páxina queda seriamente en dulda, porque Vulture (tenéis la noticia orixinal calcando equí) acaba de descubrir una trama turbia na que se tien pagao a periodistes pa escribir bones reseñes y, asina, aumentar la nota de delles películes. Pelo menos eso ye lo que pasó con Ophelia (2018), basada nel personaxe de Hamlet, y que tenía unes crítiques malísimes hasta qu’ocho periodistes de segunda empezaron a ponela peles ñubes (ente ochobre de 2018 y xineru de 2019). D’esta manera, la película algamó una nota del 62%, siendo un 60% lo preciso pa pasar la llende de “podre” a “fresca” (clasificación que fai referencia a los tomates que dan nome a la páxina). Esto, paez ser, ye lo que permitió la so distribución en cines d’EE.UU., y polo tanto un montonáu más de recaldación pa la productora Covert Media.
Pos bien, como indica Vulture, estes crítiques foron consecuencia de que la productora contratara a una empresa de rellaciones públiques, Bunker 15, que pagó cincuenta dólares a caún d’estos periodistes por escribir la reseña positiva. La respuesta de Rotten Tomatoes foi borrar rápido les crítiques de la película, pero estos periodistes tamién tienen escrito sobre otres munches, como Wildflower (con Alexandra Daddario) o Gasoline Alley (con Devon Sawa y Bruce Willis).
Tovía nun se conoz l’algame d’esta trama, pero ye bultable que la reputación de Rotten Tomatoes queda puesta en seria dulda (anque esta páxina nun tenga nenguna culpa), pos hasta agora nun había más que rumores sobre estes práctiques per parte de la industria cinematográfica. Tamién sorpriende, la verdá, lo barato a lo que se viende la integridá periodística.
