Escomenzamos un boletín de noticies selmanal tocántenes a lo que se tien llamao “cultura friki”, coles nueves más llamaderes de lo asocedío nos últimos díes. Ensin más entamu, p’allá vamos:
Plan de Warner pa 2021:
Pola mor del andanciu, Warner anuncia que va estrenar toles películes, d’equí a finales de 2021, na plataforma HBO Max al empar que nos cines. Ello inclúi grandes producciones como Wonder Woman ‘84, Suicide Squad 2, Godzilla vs. King Kong, Dune, The Matrix 4 y Mortal Kombat. A los actores a los que-yos prometieren un porcentax de les entraes van da-yos una compensación económica pola perda, como ye’l casu de Gal Gadot (diez millones de dólares pal bolsu). Yá muncho primero de lo que s’esperaba, namás trés meses depués de sacala nos cines, xubieron a la plataforma en streaming Tenet, la película cabera de Christiopher Nolan; al director nun-y fixo nenguna gracia, asina qu’anda per ende montando l’espolín y poniendo la compaña a cayer d’un burru.
Series nueves de Star Wars:
Tres del ésitu de The Mandalorian, Disney anuncia que yá ta filmando una segunda serie centrada en Cassian, el personaxe de Rogue One qu’interpreta Diego Luna. Entá nun dataron la estrena, pero paez que ye pa 2021. Eso sí, sedrá más sero que ceo, qu’aponer tantos efeutos especiales lleva un cachu. De la d’Obi-Wan Kenobi, anque ye pa más tarde, cunten que va salir Hayden Christensen como Darth Vader, amás d’Ewan McGregor como protagonista.
Agora Alien ye de Disney y Marvel:
En mercando Fox y sumándola a otres propiedaes como Marvel, Pixar o Lucasfilm, yera bultable que Disney nun diba tardar n’esplotar les llicencies más codaloses de la productora. Anuncien que van sacar una serie de televisión pa Hulu, entá ensin fecha, y pa marzu’l primer númberu d’una serie abierta de cómics Marvel, con guión de Phillip Kennedy Johnson y dibuxos del valencianu Salvador Larroca. Podemos suponer que nun van apostalgar demasiao facer daqué asemeyao con Predator, depués un Alien vs. Predator, enfrentalos a los X-Men o tolo que se-yos ocurra. Sedrá por perres.
Adautación actual d’El Zorro:
La NBC ta preparando una serie de televisión qu’adauta El Zorro, el clásicu héroe amazcaráu, al sieglu XXI. Ente los creadores tán Robert Rodriguez, Rebecca Rodríguez y Sofia Vergara, polo que podemos esperar latinxploitation de la bona. Tratará d’una artista moderniega, Sola Dominguez, a la que tamién-y avaga lluchar escontra’l crime y la inxusticia social.
Peli de mieu de Blomkamp:
Neill Blomkamp, director de District 9, Elysium y Chappie, tuvo rodando esti branu la so primer película de mieu, na qu’amiesta la ciencia-ficción tan carauterística de les sos películes con una temática sobrenatural. Entovía nun quier cuntar de qué va, pero viendo los trabayos anteriores de xuru que paga la pena.
Y fasta equí’l boletín. Vémonos la selmana que vien.
