Wednesday Addams, de nueves con Tim Burton:
El direutor prepara’l so primer proyeutu pa televisión, y ye de la mano d’un personaxe que yá conoz perbién. Recupera’l personaxe de Wednesday, la fía gafa y murnia de la macabra familia Addams, p’amosanos cómo se convierte de neña a moza (con dellos misterios sobrenaturales de pel mediu). Entá nun sabemos muncho de la serie: que la produz Netflix y que va asitiase na “Academia Nevermore”, probablemente un internáu.
Vuelven el Batman y el Superman de los paisanos:
Yá que falamos de Tim Burton, paez menester comentar que DC anuncia una continuación de les sos películes de Batman, anque esta vuelta seya en cómic.Va llamase Batman ‘89, pol añu de la estrena la primera.El cómic dirá darréu de Batman Returns (la de la Muyer-Gata y el Pingüín), escaeciendo los cosos aquellos que Schumacher fixo dempués col probe caballeru escuru. Tamién anuncien Superman ‘78, que fai remanecer el maraviosu Superman de Christopher Reeve pa cuntanos una hestoria allugada ente medies de les dos primeres películes del home d’aceru.
The running man:
Stephen King escribió la novela (magar que con seudónimu) y Arnold Schwarzenegger protagonizó la película dellos años dempués. Si nun vos suena, va d’un reality show alloriáu nel qu’acaba la xente que resulta más problemático pal gobiernu, y nel que los concursantes han fuxir d’asesinos qu’anden escorriéndolos. Agora tán preparando’l remake, con Edgar Wright como direutor (Shaun of the Dead) y l’envís d’apegase a la obra orixinal más que la película anterior, lo que tampoco nun paez mui malo de consiguir.
