Películes a esgaya:
Esta selmana tenemos tantos anuncios de películes que cuasi nun cueyen na seición, conque vamos tentar de resumir un poquitín:
- Vien un reiniciu de Jeeper Creepers, aquella triloxía de mieu na qu’un monstruu con sombreru y gabardina escuerre mocinos pela carretera. L’argumentu y delles llinies de guión de les películes orixinales tomen significaos nuevos y enforma tenebrosos desque condergaron al direutor por abuso de menores, asina qu’esperemos que puean dexar atrás eses coses tan turbies y facer daqué interesante.
- Anuncien tamién una continuación de District 9, la que foi la primer película del agora nomáu Neil Blomkamp, y na que nos presentaba una barriada d’inmigrantes estraterrestres. La película nueva va llamase, cómo non, District 10, anque pel momentu nun sabemos más. Quiciabes porque entá nun estrenaron la postrer película del direutor, Demonic, y nun quieran que les nueves d’una pisen protagonismu a la otra.
- Monster High, aquelles moñeques de rapaces monstruoses tanto como estiloses, y que yeren tou un fenómenu va yá unos cuantos años (llanzáronles en 2010), van revilvar en forma de película d’aición real. Sabemos que va ser un musical, y tamién qu’el proyeutu ta nes manes de Nickelodeon y Mattel. Por estos últimos podemos suponer que la película vendrá acompañada d’abondo merchandising, qu’al cabu y al fin yera l’envís de los dibuxos.
- Polo que Henry Cavill espubliza nes redes paez bastante bultable que va protagonizar una película basada en Mass Effect, unos videoxuegos ambientaos nun universu de ciencia-ficción fechu con abondo detalle y curiosura. Pero ye verdá qu’entovía nun hai nada confirmao.
- Pueque porque Cavill tea mui ocupáu con esa y otres coses o pueque porque DC nun anda con munchu tinu neso d’adautar los personaxes al cine,ero dicen que J. J. Abrams ta tresnando una versión nueva de Superman onde otru actor tomaría’l papel protagonista. Cuerre l’apellíu de que taríen a la cata d’un actor d’una minoría étnica, y anque cosa tala nun sedría nueva pa los llectores de cómics, porque yá hebo unos cuantos personaxes afroamericanos que llevaron la ese en pechu, de xuru que si asocede se montaría un bon espolín n’internet (cola publicidá de baldre qu’eso lleva venceyao).
Magic Kingdom, universu Disney:
L’imperiu Disney ye famión como él solu, y aínda en plenu espoxigue de los universos de Marvel y Star Wars yá anda mirando d’alcontrar otru filón. Con una serie nueva, The Society of Explorers and Adventures, busca afustacar pa la creación d’un universu en comuña qu’axunte toles atraiciones de Magic Kingdom, parque temáticu de Disney World. Ello incluye Pirates del Caribe, Peter Pan, La Serenina, Dumbo, Mickey Mouse, Blancañeves y un cientu más de personaxes, polo que ta por ver como faen p’amestalo too nun únicu universu.
Dibuxos de ciencia ficción:
A lo último, señalar que más pronto que tarde vamos ver un bon puñáu de nueves series animaes de les franquicies más sonaes de la ciencia-ficción. Nickelodeon va sacar dos dirixíes a los neños, Star Trek: Prodigy (con Kate Mulgrow dando voz a la capitana qu’interpretara en ST: Voyager) y una nueva de Transformers. Netflix, pela so parte, anuncia un anime de Terminator fechu por Production I.G. (los d’Evangelion o Ghost in the Shell, ente otros munchos) y qu’abulta más p’adultos.
