Los vampiros tán de vuelta:
Yá lleven un tiempu falando del reiniciu de Blade, con Mahershala Ali (Moonlight, Green Book) como protagonista y que van escomenzar a rodar a finales d’añu. Agora tamién anuncien que van facer una película del mangaHellsingde Hirano Kōta, nel qu’un descediente del cazador de vampiros con más nomadía sigue col oficiu la familia. Y por si foren poques coses de vampiros, acaben de vender los drechos televisivos y cinematográficos del personaxe de cómic Vampirella, sobre una vampira mui atotada y en trikini coloráu que vien del planeta Drakulón, conque ye de suponer que nun van tardar muncho n’adautalu. Paez que los vampiros van tar de moda de nueves.
L’Universu Star Trek sigue espoxigando:
A ST: Discovery, ST: Picard y los de dibuxos ST: Lower Decks, pronto van xunise ST: Prodigy (de la que falemos la selmana pasada) y ST: Strange New Worlds, sobre los viaxes de la Enterprise poco primero de Kirk ser el capitán. Dempués d’abondos rumores sobre proyeutos cinematográficos (mesmamente que Tarantino diba dirixir una película), paez que la cosa por fin va p’alantre con J. J. Abrams na producción. Entá nun sabemos si va tar asitiada n’universu tradicional o nel mesmu que les trés películes caberes, pero dirémosvoslo en cuantes que lo anuncien.
Alien por Neil Blomkamp:
Va unos años falábase de que’l direutor taba pa facer una película d’Alien na que Sigourney Weaver intepretara a Ripley una vegada más, pero acabaron decidiendo nun clisar los otros proyeutos de la franquicia, Prometheus y Alien: Covenant. Agora que Disney mercó Fox y tien ganes de probar los xuguetes nuevos, revilven esta idea que nun paez pintar nada mal. Veremos si hai suerte y tiren p’alantre.
Más Dungeons & Dragons:
Como cuasi toles selmanes, trayemos nueves de la película de fantasía, qu’abulta que van sacando adulces pa da-y hype. Agora dicen que se sumen al proyeutu Hugh Grant (como’l malu) y tamién Sophia Lillis (It, I am not okay with this), que polo moza y roxa que ye paez afitar la teoría de que la película tará basada na serie de dibuxos de los ochenta, siendo perfeuta pal papel de Sheila.
A estes, tamién anuncien que tán trabayando nun videoxuegu en mundu abiertu basáu na franquicia.
