Proyeutos nuevos de DC:
Tres la estrena del Snyder’s Cut de la Lliga de la Xusticia, DC prepara más proyeutos esclusivos pa HBO. Ún ye una película de Batgirl, la mocina amazcarada que llucha escontra’l crime en Gotham, y que dacuando ye fía del comisariu Gordon, dacuando sobrina (y na película Batman Forever d’Alfred el mayordomu). Otru proyeutu, una serie de Zatanna, la bruxa con más sonadía de los cómics DC. Nun paez coincidencia que la anuncien dempués del ésitu de Marvel con Wandavision, y sumándose al proyeutu de la serie yá anunciada d’otru fechiceru, Constantine, paez qu’anden abriendo camín a una posible Lliga de la Xusticia Escura, la versión paranormal del superequipu.
Cambéu na política de Netflix:
Ye sabío que Netlix nun puchaba a naide por compartir la cuenta, y ta enforma espardío el compartir una sola cuenta delles persones. Paez qu’esto ta cambiando, porque principien a unviar mensaxes que recuerden que nun pues usar la cuenta si nun vives na mesma casa que’l soscritor. Probablemente tien que ver con que tien Disney + nos calcaños (calculen que tendrá más veceros que Netflix pa 2026), pero igual ponese agresivu colos clientes nun ye la meyor manera de competir.
Avatar nel primer puestu. De nueves:
Como col andanciu nun tán por estrenar películes nueves nos cines, anden reestrenando les vieyes. Una ye Avatar, que yera la película más recaldosa de la historia fasta la cuarta película de Los Vengadores 4 quita-y el puestu. Agora recupéralu, pero nun sabemos si eso va ayudar a qu’entaínen a sacar la continuación que lleven años a esgaya prometiendo.
