Otra matancia de Texas:
El clásicu d’horror de mil novecientos setenta y cuatro tien tantes continuaciones y versiones qu’hai que buscar n’Internet pa ser a dicir cuántes. Por embargu, agora anuncien una especialmente llamadera, y ye que nella van salir un Caracueru vieyu y la que fora la moza sobreviviente de la primer película, interpretada pola mesma actriz, Olwen Fouéré. Viendo’l plantegamientu podemos maxinar que sedrá daqué pol estilu de les nueves de Halloween, y la verdá qu’eso promete.
Temporada doble d’American Horror Story:
L’andanciu torgó que rodaren la temporada d’AHS en tiempu d’echala en 2020, pero anguaño, pa compensar, van sacarr dos temporaes d’un tirón. Sabemos que la primera va tar ambientada en dalgún llugar mariñán, y polos cartelos de boques con dientes puntiaos ye de suponer qu’habrá dalguna mena de serenes malvaes (¿o quiciabes “fonderos” lovecraftianos?). De la segunda, que paez que va allugase nun ermu y más nada. Recordamos que, amás, van estrenar American Horror Stories, una antoloxía de los mesmos creadores, y que solo se diferencia en que cada hestoria dura un capítulu y non una temporada. Conque ta claro que si te presta AHS vas tener fasta refalfiar.
Serie de Cowboy Bebop
Anuncien el repartu de Cowboy Bebop, l’adautación n’imaxe real d’ún de los animes meyor consideraos. Ye una hestoria de ciencia ficción ambientada n’añu 2071, y na qu’unos cazarrecompenses viaxen pel espaciu a la cata de criminales. Van protagonizala John Cho (Harold & Kumar, Star Trek), Mustafa Shakir (The Deuce) y Daniella Pineda (Mercy Black, The Detour).
Más películes de Blumhouse:
Va unos meses falábemos de que la nomada Blumhouse entraba nes producciones de televisión de la mano de Hulu, con cuatro películes (equí reseñaes) que dientro poco van ser ocho. Paez que la cosa salió bien, porque van sacar otra antoloxía pa Epix, otra canal de streaming. Pel momentu namás sabemos que la primera, A House on the Bayou, va protagonizala una familia que pasa les vacaciones nuna barraquera de Luisiana (tamién vaya ganes) y recibe unos visitantes inesperaos.
