Detalles d’Obi Wan Kenobi:
La serie nueva de Star Wars va escomenzar a rodase n’abril, anque tovía nun sabemos pa cuándo la estrenarán. Arriendes d’Ewan McGregor como Obi-Wan y Hayden Christensen como Darth Vader, suménse a repetir papel Joel Edgerton y Bonnie Piesse como Owen y Beru Lars, los tíos de Luke que lu afíen a la final del Episodiu III.
Cuerre la voz de qu’habrá un cruz enteObi-Wan Kenobiy Andor, la serie sobre les aventures del personaxe de mesmu nome de Rogue One. Sicasí, sabemos yá d’otres ocasiones que rumores d’esta mena nun hai que los tomar mui en serio fasta tar bien afitaos.
El Doctor Fau en Black Adam:
Tenemos más información sobre la película del antihéroe encarnáu por The Rock, y ye que nella va salir Pierce Brosnan faciendo del Doctor Fate, el fechiceru davezu definíu como “el Doctor Estrañu de DC” anque ñació más de venti años primero.
Por si nun lo sabéis, Black Adam ye un personaxe, dacuando héroe pero les más de les vegaes villanu, que surdió nes páxines de Captain Marvel, l’héroe agora conocíu como Shazam (un cambéu de nome por motivos obvios, pos ye propiedá de DC). Talamente como Shazam tien los poderes de los dioses griegos, Black Adam tien los de los exipcios, pero pa nada ye tan falatible y bonaz como él.
La estrena va ser en xunetu de 2022.
Vida llarga y prosperidá:
El Muséu de Ciencia de Boston anuncia que va echar arriba una escultura n’honor al fináu Leonard Nimoy, l’actor oriundu de la ciudá que dio vida al vulcanu Mister Spock nes series y películes de Star Trek, nada menos que dende 1966 fasta 2013. Esta va consistir nuna mano saludando d’aquel mou tan pecuñar, y faenlo, dicen, pol so compromisu cola ciencia, la curiosidá intelectual, l’arrogancia y la lóxica, recordándonos lo meyor de la humanidá y amosándonos cómo construyir una sociedá sofitada na razón y la tolerancia. Nun ye daqué de lo que tar arguyosu nin nada.
