Película de los Thundercats:
Tres del ésitu inesperáu en cines de Godzilla versus Kong (inesperáu, dicimos, por asoceder mientres l’andanciu), Warner decide poner el so direutor, Adam Wingard, al mandu de la película de Thundercats, basada na mítica serie de televisión de mesmu nomd de los años ochenta.
Esta serie, que yera una de les que naquella amestaben animación americana y xaponesa, trataba d’unos estraterrestres, homes y muyeres felinos (caún d’ellos basáu nuna especie) qu’en fuxendo d’enemigos mutantes aporten a una Tierra posapocalíptica, u espierten la momia d’un fechiceru perpoderosu y permalváu.
Bilordios sobre’l Capitán América:
Abondos medios especializaos espardieron la noticia de que Wyatt Russell, l’actor que fai del Capitán América nuevu na serie The Falcon and the Winter Soldier (y que sabemos polos cómics que llueu sedrá U.S.Agent, una versión menos moral del superhéroe) coló de toles redes poles amenaces y insultos que ta recibiendo. La verdá ye que sedría daqué díficil, porque nun tenía perfiles yá d’enantes, pero taría bien que la xente tuviera más nidia la diferencia ente realidá y ficción (arriendes de que’l personaxe ta fechu, xustamente, pa cayer mal).
Serie del Moñecu Diabólicu:
Chucky, el moñecu poseyíu por un asesín en serie, va tener pronto una serie de televisión que siguirá les correríes del nuesu sicópata de plásticu favoritu.
Pel momentu sabemos que va tener un tonu de película de mieu p’adolescentes, con cuatro rapazos como protagonistes, y que’l míticu y bastante desapaecíu Devon Sawa tien un papel del que tovía nun sabemos nada. Tamién siguirá saliendo Jennifer Tilly como Tiffany Valentine, “la moza de Chucky”, y que Brad Dourif va siguir poniendo la voz al moñecu.
