Netflix y Sony roblen tratu:
Les canales en streaming xorrecen que nun ye nin medio normal, pero paez que de momentu nun vamos tener de ser veceros d’una más pa ver les películes de Sony. Esta acaba llegar a un alcuerdu con Netflix pa que, llueu de salir en cines, seya na so plataforma u tengamos accesu a elles. Ente estes alcuéntrense les películes del nomáu spiderverse (Venom, Morbius) o les adautaciones de los videoxuegos de Playstation que tán por venir (como Uncharted).
Ciencia ficción en camín:
La mesma Netflix anuncia que va sacar una película d’aición real de Gundam, l’anime míticu de robós xigantes (o más bien una riestra d’animes, porque dende 1979 salieron como venti series y un cientu películes). El direutor y productor va ser Jordan Vogt-Roberts, el que yá dirixó Kong: Skull Island.
Pola so parte, Paramount ta preparando una película nueva de Star Trek, y anque va siguir produciéndola J. J. Abrams (l’encargáu de les trés caberes) tovía nun sabemos si van asitiala nel univesu clásicu o nel de les sos (onde, per aciu d’un viaxe nel tiempu y la creación d’un universu alternativu, tornen a cuntar hestories de los personaxes clásicos).
Güeyos de Culiebra:
G.I.Joe tienta de volver llueu de dos películes bastante perroneres, y failo con una especie de precuela na que nos cunten l’orixe d’ún de los sos personaxes, Snake Eyes, qu’amás ye’l más misteriosu. Ye llamadero que na película va salir Úrsula Corberó como la mala, Baroness.
Queda por ver si llogren llevantar la franquicia.
Torna Buffy la cazavampiros (bono, más o menos):
Kendare Blake, la escritora pa young adults de les triloxíes Three Dark Crowns o Goddess War entama una serie nueva de noveles que va tener la sobrina de Buffy como protagonista. Na primera, cola ayuda d’un demoñu y un home llobu, la mocina va tener d’asegurase de que la Boca l’Infiernu nun vuelva a abrise en New Sunnydale. Anque, la verdá, si quier facer delles noveles cuasique nun lo va consiguir. Calculen que saldrá pa iviernu de 2022.
