Adautando a series:

Anuncien que tán tresnando delles series basaes n’obres bien conocíes. Una va ser d’American Psycho, la novela de Bret Easton Ellis que yá adautaron a película con Christian Bale de protagonista, y que trata d’un yupi despiadáu qu’amás ye asesín en serie. Otra ye Arlington Road, basada n’aquella película de 1999 na qu’un personaxe interpretáu por Jeff Bridges sospechaba que tenía un vecín terrorista (Tim Robbins). Tamién tienen pensao, anque tovía ta nes primeres fases de desarrollu, facer una serie de Saw, la saga de películes de mieu nes qu’un chaláu anda enzarrando xente pa sometelo a xuegos macabros. A estes, ta pa salir una continuación nueva nos cines, Spiral: Saw, yá en mayu.

Monstruos nos cines:

Col ésitu de públicu y crítica de The Invisible Man, Universal decatóse de que fixo mui bien dexando que Blumhouse adaute los monstruos clásicos, conque yá preparen otra película, Renfield. Pueque’l personaxe, asina mentáu, nun vos suene, pero si lleístis o vistis dalguna adautación de Drácula cuasique recordaréis un esclavu que tien y que va pehí faciendo-y recaos y comiendo bichos. Esi ye Renfield, polo que paez que vamos tener una película de Drácula dende una perspeutiva nunca vista, daqué que yá paecía imposible.

Y yá que falamos de monstruos clásicos, si tenéis yá cierta edá de xuru que recordáis los Munsters, una familia nada típica: pá frankenstín, ma y güelu vampiros, un fíu medio llobu y una sobrina percuriosina y de lo más normal, anque pa los demás ye un adefexu. Pos nada menos que Rob Zombie, el cantante y direutor d’un bon puñáu de películes d’horror, tien ente manes adautar la idea a película. Tovía nun sabemos si caltendrá l’espíritu camp de les series de televisión o fadrá daqué mas tenebroso, pero polos sos antecedentes paez enforma más probable lo segundo.

Emilia Clarke nel mundu los cómics:

Nun ye solo que Mavel la fichara pa Secret Invasion,una de les abondes series que tán estrenando en Disney + (y que trata d’una invasión a llobaes d’estraterrestres metamorfos), sinón qu’ella mesma va convertise n’autora. En xunetu sal nos Estaos Xuníos el primer númberu de trés de M.O.M.: Mother of Madness, cómic sobre una ma soltera que s’enfrenta a una rede de trata en descubriendo que tien superpoderes. Emilia Clarke coguionízalo con Marguerite Bennett (DC Comics Bombshells, Animosity) y dibúxalo Leila Leiz (Alters, NVRLND).

1 comentariu


Leave a Reply

La to direición de corréu nun va espublizase. Los campos riquíos márquense con *