Torna Percy Jackson; abulta qu’agora bien:
Les plataformes de televisión en streaming, sobre manera Disney +, tán sabiendo sacar ganancies de series tan cares como les mayores superproducciones de cine. Agora esta canal anuncia que ta tresnando, con un presupuestu al nivel de Wandavision o The Mandalorian,una serie de Percy Jackson, aquel fíu neoyorquín de Poseidón que protagonizó una serie de llibros pa xente mozo (y dos películes enforma reguleres que mesmamente l’escritor criticó).
Alan Moore robla facer una saga de fantasía:
Munchos atristayáremos al ver qu’Alan Moore (autor de Watchmen, V of Vendetta o The League of Extraordinary Gentlemen, ente munches otres coses)dexaba pa siempre’l mundu’l cómic, pero paez ser que nin p’atrás va perxubilase. Acaba de roblar cola editorial Bloomsbury l’espublizamientu de Long London, una serie de cinco llibros de fantasía asitiaos nel Londres de 1949, y na que podremos atopar maxa, crimes y la esistencia d’otru Londres atapáu. Tamién tienen robláu l’asoleyamientu d’una coleición de cuentos, que va nomase Illuminations.
Frightland, más velees pa guaḥes:
Y pa siguir falando de llibros, comentar que si por un acasu vos prestaben les Goosebumps de R.L. Stine paez que tais de norabona, porque salió p’alantre’l crowdfunding d’una serie de llibros que va homenaxar la obra, y que fasta cunta col mesmu ilustrador. Sicasí, l’autor, H.M. Grimly, nun tenía nada escrito fasta anguaño, polo que pel momentu tampoco nun vos enfotar.
Tresnando delles películes:
Lleven años diciendo que van facer una película de Red Sonja, una guerrera roxa que vive na dómina de Conan y que crearon nos cómics de Marvel, anque agora pertenez a la editorial Dynamite. Abulta que la cosa por fin avanza, porque acaben d’anunciar que Hannah John-Kamen (Killjoys, Ant-Man and the Wasp) va dar vida al personaxe. Esperemos que pelo menos la película tea penriba del espantu que fixeron nos ochenta, lo que tampoco debe ser mui malo de consiguir
Per otru llau, el que fora creador (guionista y direutor) de la primer película de Leprechaun (na qu’un trasgu irlandés, encarnáu por Warwick Davis, atemoria a la per entós mui mocina Jennifer Aniston) diz que quier tornar a facer daqué de la mesma temática, pero que como salieron munches continuaciones y el leprechaun ta yá mui vistu, que taba atalantándose-y facer una película d’un “vamprechaun” un amiestu de trasgu y vampiru. Daveres que, cuando pensabes que taba too inventao, daquién sal con estes.
