Cyberpunk, Justice League y Otres Coses
Vamos col segundu boletín selmanal de noticies friquis, nel que cuntamos les nueves más llamaderes de lo asocedío nesti mundu nos díes caberos.
Cyberpunk 2077
Si daqué dio bien de falar esta selmana, eso foi ensin dulda la salida’l videoxuegu Cyberpunk 2077, llueu d’ocho años esperando por él. Paez que nun tuvo al altor de tantes espeutatives, falten coses que prometíen que diba haber y ta infestáu de bugs y problemes de rindimientu, sobre manera pa PS4 y Xbox One. Tantos son que la compaña, CD Projekt RED, tuvo d’ufrir la posibilidá de descambialu, arriendes de prometer parches pa dientro poco colos que se supón qu’iguarán los fallos más gordos.
Más allá del Snyder’s Cut de Justice League:
Tres del chascu la película qu’habría ser l’Avengers de DC, Warner va un poco al debalu tocántenes a construyir un universu en comuña pa les sos películes de superhéroes. Agora tán gastando una barbaridá en refacer Justice League talamente como quería’l direutor orixinal, pa ver si asina consiguen recuperar un rumbu pa les vinientes. Anuncien que ye probable que la clasifiquen p’adultos pola violencia y los cagamentos, y que va ser tan llarga que la sacarán en HBO Max (pa marzu) como una miniserie de cuatro capítulos d’una hora.
Y mentanto, DC Infinite Frontier:
Dempués de dexar temblando DC, con dos tandes de despidos de cargos direutivos y un ascensu a los sos puestos de munchos de los que s’encargaben de la esitosa llinia pa xente mozo, la editorial de cómics anuncia’l milentésimu rellanzamientu de les sos series: DC Infinite frontier. Vien en marzu y abulta nun ser ún más; nun cambien solo, como ye vezu, los status quo de los personaxes y los equipos creativos, tamién peguen una vuelta a otres coses como los formatos, la distribución o’l serviciu de llectura online. Ún de los cambeos más significativos ye que faen una apuesta poles antoloxíes, cómics de mayor gordor nos que veremos delles hestories de personaxes y autores distintos. Exemplos son Batman: Urban Legends, protagonizada por Batman y personaxes rellacionaos, o Superman Red & Blue, hestories del superhéroe prototípicu cola peculiaridá de que’l dibuxu va tener namás tinta azul y colorao.
Chris Pine, Protagonista de Dungeons & Dragons:
Anque yá lleven un bon tiempu tresnando la película, sábese bien poco d’ella. Nun sabemos, por casu, si se basará nuna les abondes noveles ambientaes nos sos mundos, na serie de dibuxos animaos de los ochenta o si sedrá una hestoria orixinal. Lo que sí sabemos ye que yá contrataron a Chris Pine (Star Trek, Wonder Woman) pa que seya’l protagonista, y que la estrena ta datada pa mayu de 2022.
La vuelta de Wrong Turn:
El ciclu de seis películes de mieu, aquelles nes qu’unos caníbales ataquen a los esveredaos na carretera o en monte, va tener una continuación nueva. Bono, pueque más bien un rellanzamientu de la franquicia, pos nun atopamos el “7” en cartelu y paez que, nesta ocasión, los malos nun son una familia de parrulos esformes, sinón unos indios que s’echaron al monte allá pela Guerra Civil Americana y pehí siguen, buscando daqué que manducar. Estrénenla en xineru y pues ver el tráiler equí.
