Actores de primera pa Knives Out 2:
Va poco que Netflix sorprendió anunciando que tresnaba unes continuaciones carísimes de Knives Out, una película del estilu de les noveles d’Agatha Christie que protagonizaben Ana de Armas y Daniel Craig. La canal pagó nada menos que 468 millones polos drechos pa facer una segunda y una tercer parte, y agora nun apara de sumar estrelles al repartu. Amás de Daniel Craig (Ana de Armas nun repite), yá sabemos qu’en Knives Out 2 vamos poder ver a Edward Norton, Dave Bautista y Janelle Monáe. Ye bultable que, a la cata de franquicies coles que facer pica escontra otres canales en streaming, tán poniendo munches ganes nesta.
Serie d’El Señor de los Aniellos:
Y siguimos colos presupuestos esparataos d’estes canales, porque la primer temporada de la serie d’El Señor de los Aniellos que va estrenar Amazon costó-y cuasi lo mesmo: 465 millones de dólares (a lo qu’hai que sumar otros costos como la compra de drechos, dando too un total de como mil millones). La serie va tar asitiada miles d’años enantes de los socesos de la triloxía, na dómina de la creación de los aniellos y la guerra escontra Sauron. Diríxela Antonio Bayona, y yá falen de facer cinco temporaes y un spin-off.
¡García!:
Paez qu’esta selmana nun vamos falar más que de streaming, porque finamos con una noticia que vien de HBO Max, anque nun ámbitu enforma más cercanu. Anuncien que yá anden produciendo una serie basada nel cómic de Santiago García y Luis Bustos, ¡García!, que trata d’un “héroe” como los de los tebeos españoles de la dómina franquista (al estilu de Roberto Alcázar), que descrioxenicen n’actualidá. Y claro, arriendes d’enfrentase a misiones nueves como’l secuestru d’una candidata a presidenta, habrá de facese a la idea de que la España d’anguaño nun ye la de los años sesenta. Como tovía tán principiando con ella, nun vamos poder vela fasta 2022.
