Amazon merca Metro Goldwyn Meyer:
Principiamos la seición con esti bombazu, y ye que la guerra ente plataformes de streaming sigue diendo a más y más. Agora, Amazon pon nada menos qu’ocho mil cuatrocientos cincuenta millones de dólares pa facese con MGM, tol so catálogu (más de cuatro mil películes) y los drechos pa siguir con franquicies como les de James Bond, Rocky/Creed o Robocop.
Películes que van tresnando:
Yá sabemos que la película de Dungeons & Dragons (con actores como Chris Pine, Michelle Rodriguez, Pierce Brosnan o Sophia Lillis) va tar asitiada nel mundu de Reinos Olvidaos (Forgotten Realms), ún de los más populares y del que tienen escrito noveles a esgaya.
Per otru llau, anuncien que Evil Dead Rise, la película nueva d’Evil Dead (anque nun va ser una continuación de les otres, sinón más bien un reboot de pol estilu del de Fede Alvárez de 2013), va salir direutamente na canal HBO Max, ensin pasar primero pelos cines.
Tamién lleguen noticies de qu’anden tresnando versiones nueves deLa Pantasma de la Ópera, o Highlander (conocida en castellán como Los Inmortales, y que tendría a Henry Cavill como protagonista), pero ye ceo como pa saber más d’elles.
Fina l’autor de Berserk:
Miura Kentarō, el mangaka que llevaba más de trenta años escribiendo y dibuxando la obra de fantasía escura Berserk, finó esti mes de mayu con namás que cincuenta y cuatro años y dexando la obra ensin terminar. Cunten que la causa de la muerte foi un problema de salú pola mor del estrafullu y l’escesu cafeína, en recibiendo un montonáu de crítiques polos munchos retrasos n’asoleyamientu de númberos nuevos de la obra. Igual habría que pensar nestes coses primero d’andar poniendo a cayer d’un burru a los autores porque nun van al ritmu que más nos prestaría.
