Entamada nel Saló del Còmic:

Acaba celebrase’l trentenu novenu Saló Internacional del Còmic de Barcelona, y nél prodúxose una polémica como nunca nun se viere. En dando’l Gran Premi del Saló a Antonio Martín, editor y teóricu del cómic, cientos d’autores roblaron un comunicaú pa manifestar que si nun-y lu retiren nun van querer saber más del Saló. Esto débese a que se supón (bultablemente, como tien sío tolos años) que’l premiu ta atropáu p’autores de cómic, nun siendo Antonio Martín talu. Amás, ye sabío que va años l’editor denunció a ún, Manuel Bartual, por facer chancia nuna viñeta d’un cómic de la mala rellación que tenía con otru autor, Cels Piñol (nesta, Cels Piñol insultábalu, y la denuncia foi pa Bartual como si-y llamara él eses coses). La organización, Ficomic, respondió al manifiestu de los autores con un comunicáu u afirma que da-y el premiu a Martín sí cumple les bases, pos estes ponen que’l premiu ha ser pa un autor español, pero non qu’ha ser autor de cómic (paez que podría ser mesmamente cantante), y qu’a quién-ylu dar decidiólu un xuráu independiente (del que de secute da nomes, apellíos y profesión como pa desentendese y que los acorvien a ellos). Ún de los miembros yá reconoció que da-y el premiu a Martín foi un error, mientres que dalgún otru echa más lleña al fueu al criticar los roblantes por metese con a quién-y da un premiu una organización privada.

Nueva película “tech-noir”:

Nesta dómina de continuaciones, rellanzamientos y adautaciones ye malo d’alcontrar una película que tenga, al empar, un presupuestu importante y un guión orixinal. Por embargu, dacuando asoma dalguna ente toles franquicies, y tamos énte ún d’estos casos con Reminiscence. Acaba salir el traile (que podéis ver equí), u nos presenten a Hugh Jackman como un “detective de la miente” que trabaya recuperando alcordances perdíes nun Miami futurista y medio somorguiáu na mar. La verdá que nun pinta nada mal.

Continuaciones de películes acabante d’estrenar:

Paez que’l cine ta recuperándose bien del andanciu, y yá anuncien que van salir continuaciones de películes qu’estrenaron apocayá. Una ye una nueva nel universu d’A Quiet Place (acabante d’estrenar la segunda), que, por si nun lo sabéis, va de qu’unos monstruos ciegos infesten el mundu y val más tase calláu si nun quies que te tarmien. Otra ye Cruella, la del orixe de la villana de 101 Dálmates, que, masque tevo un ésitu más discretu nos cines, paez que funciona’l métodu de Disney d’estrenar la película al empar na so canal de streaming (con un pagu estra pa poder vela). La continuación tien lluz verde, y va cuntar col mesmu guionista y el mesmu direutor.

Leave a Reply

La to direición de corréu nun va espublizase. Los campos riquíos márquense con *