Vertigo, un videoxuegu hitchcockín:
Pendulo Studios ta desarrollando un videoxuegu nomáu Alfred Hitchcock’s Vertigo, masque paez que nun va ser una adautación chapada na película clásica. Si va tener, aseguren, una temática paecida, un protagonista que sufre vértigu y unos planos y un remane de la tensión mui propios del direutor. Saldrá primero de finar l’añu en toles plataformes (Playstation 4 y 5, X-Box One y X/S, Nintendo Switch y PC), y yá podéis ver un traile equí.
Repartu de superhéroes:
Toles páxines de prensa especializao cuerren los pliegos sobre un rumor que tovía naide nun negó, y ye que na película viniente de Black Panther, Wakanda Forever, va salir Tenoch Huerta (Narcos: México) interpretando a Namor, el rei atlante que foi’l primer superhéroe de Marvel, creáu por Bill Everett allá per 1939 (dos años primero d’Aquaman).
Mentanto, DC acaba sacar un traile curtiu (que podéis ver equí) de la película de dibuxos League of Super-Pets, sobre les mascotes de los superhéroes más nomaos. Ente ellos podemos atopar a Krypto, el Superperru, al que-y pon voz nada menos que Dwayne “The Rock” Johnson, y Ace, el Bat-Sabuesu, al que-y pon voz Kevin Hart. Puen paecer un inventu un poco raru, pero dambos dos personaxes yá apaecíen pelos cómics en 1955.
Más películes de mieu:
L’estudiu Searchlight ta faciendo una mestura de thriller sicolóxicu y comedia negra que va tratar sobre la moda culinaria d’andar tol ratu prebando coses nueves, meyor cuanto más rares, y podemos suponer que na película l’asuntu tirará pa lo macabro. D’ella yá sabemos qu’Anya Taylor-Joy va ser la moza de la pareya protagonista, y que Ralph Fiennes tien el papel del cocineru. Cunten qu’anden negociando con Daniel Radcliffe pa que faiga de sí mesmu como ún de los convidaos a la preba, pero tovía nun se sabe si la cosa va estremar.
Per otru llau, Sony y Blumhouse anuncien que van facer una versión nueva de Christine, la novela aquella de Stephen King na qu’un coche endemoñáu anda pehí arrollando los que traten mal al propietariu. El guión y la direición van ser a cargu de Bryan Fuller, el creador de Hannibal y Star Trek: Discovery.
Series animaes a esgaya:
Al montonáu de series de dibuxos qu’anda tresnando Netflix súmense otres cuantes: Una, Bright: Samurai Soul, va tar asitiada n’universu de la película Bright, anque colos orcos y elfos poblando’l Xapón feudal. Otra ye Twilight of the Gods, na que’l polémicu Zack Snyder va versionar la mitoloxía nórdica a la so manera tan especial. Ta Exception, que ye de mieu, tamién una nueva de la saga Gundam, adautaciones de manga como Shaman King y Edens Zero, y unes cuantes basaes en videoxuegos: Splinter Cell, Captain Laserhawk (spin-off de Far Cry) y una segunda de Castlevania (acabante finar la que taben echando). Vaya barbaridá.
Ah, y a estes, acaba salir el traile del rellanzamientu de He-Man, que ye continuación direuta de la de la serie los ochenta, y podéis velu equí.
