Los héroes nun faen sexu oral:
El títulu pue resultar chocante, poques gracies, pero vien d’una polémica dada en Twitter nos díes caberos. Resulta que los creadores de la serie d’animación p’adultos de Harley Quinn comentaron nuna entrevista a Variety que quixeron facer una chancia na que se viera o entendiera que Batman-y facía sexu oral a Catwoman. Ye, como dicimos, una serie p’adultos, y los dos personaxes yá tuvieron más escenes de sexu nos cómics, pero dende enriba dixéron-yos que nun podía ser, yá que “los héroes nun faen eso”. Ablucaos, los creadores entrugaron si ye que los héroes son egoístes na cama, y respondiéron-yos que nun yera por eso, sinón que tres d’una escena asina sedría más difícil vender moñequinos del personaxe. Evidentemente, la goña fecha nes redes sociales foi de bigotes, y mesmamente salió’l fíu de Dave Cockrum (dibuxante co-creador d’unos cuantos de los X-Men más nomaos) p’amosar unos dibuxos inéditos del pá nos que Nightcrawler nun ye tan repunante pa con Storm.
Vuelve dos sagues de mieu:
V/H/S, lo que yá yera una triloxía d’horror (y con un spin-off basáu nuna les hestories, Siren) va sumar una película más a la saga, V/H/S 94. Fasta agora, cada película yera una antoloxía de “grabaciones atopaes” nes qu’asocedíen coses espantibles pero ensin nenguna rellación ente elles, sacantes los intervalos ente una y otra nos que nos amosaben quién taba viéndoles. Agora, por embargu, prometen que les hestories van formar una, tando toes xuncíes.
Per otru llau, paez ser que Metro Goldwyn Meyer (productora que, como cuntemos va unes selmanes, mercóla Amazon) dio lluz verde a una tercera parte de Blacula, “el Drácula negru”. Por si nun sabéis d’esti vampiru tan estrañu, ñació na llamada blaxploitation de los setenta (xéneru dirixíu al públicu afroamericanu, enllenu d’aición, tiros y música funky) y tevo dos películes, Blacula (1972) y Scream, Blacula, Scream (1973). Dicen que quieren siguir onde lo dexaron, faciendo que, tres de lo asocedío na segunda película, Blácula espierte nun mundu poscovid.
El Vengador Tóxicu:
Va tiempu que se sabe que Legendary Pictures anda tresnando un reboot de The Toxic Avenger, una comedia gamberra de serie-B de los ochenta sobre un superhéroe esforme con una fregona como arma. Siguen sumando actores al repartu y paez que la cosa va en serio, porque yá tienen a Peter Dinklage como protagonista, a Kevin Bacon como villanu, y tamién anden pehí Elijah Wood y Julia Davis.
