Proyeutos de Disney
Yá asoleyaron una montonera de semeyes (pues veles equí) feches nel rodaxe de la versión nueva de La Serenina, cola que yá hebo quien s’escandalexó al anunciar que la protagonista sedría afroamericana (l’actriz Halle Bailey). Mientres, la compaña yá anda tresnando una versión nueva de Blancañeves, con Rachel Zegler de protagonista (l’actriz que fai de Maria na versión de West Side Story que va salir nunos meses).
D’otra manera, l’escritor Christopher Paolini entamó una campaña nes redes sociales pa que Disney + rellance Eragon, l’adautación del so ciclu de noveles fantástiques de les que Fox yá llevó la primera al cine, anque la verdá qu’ensin munchu tinu (agora Fox pertenez a Disney, siendo ellos los que tienen los drechos).
Los drechos d’autor d’un dios:
Mientres saca un episodiu a la selmana de Loki,la ésitosa serie sobre’l villanu de Marvel, Disney métese nun matu tremendu al principiar a denunciar merchandising del dios nórdicu. Pel momentu yá consiguió qu’una páxina se quitara de vender una camiseta con un grabáu del dios del sieglu XVIII, retirándola pa evitar metese nun xuiciu escontra la compaña. Ye’l personaxe de Marvel, poques gracies, el que ta basáu nel mitolóxicu, non al aviesu (de fechu, tamién sal un Loki n’American Gods, otru en Stargate, otru en Saint Seiya y mesmamente otru nos cómics de DC), polo qu’esperamos que daquién apare los pies al xigante del entretenimientu y al so ensame d’abogaos.
Series que vienen (y yá conocemos):
Nos últimos díes lleguen anuncios de series que, anque nueves, yá sabemos de qué van. Una ye una adautación nueva de la novela Entrevista col vampiru por parte d’AMC que mercó los drechos de toles Cróniques vampirines d’Anne Rice (asina como del ciclu de Les bruxes de Mayfair), polo que podemos esperar que la cosa vaiga pa llargo.
Otru ye la torna de Smallville, la serie dosmilera que cuntaba la mocedá de Superman, y llueu siguió como serie de cómics. Agora anuncien que se va convertir en serie d’animación, colos mesmos actores poniendo la voz al kryptonián y a Lex Luthor (pelo menos ellos dos, pero dicen que miren de convencer los más posibles del repartu orixinal).
Tamién va volver la llarguísima Supernatural (que tevo nada menos que quince temporaes), agora en forma de precuela que cuntará’l pasáu de la familia Winchester. Va ser narrada por Jensen Ackles, qu’interpretaba ún de los hermanos protagonistes, y al qu’interpretaba l’otru, Jared Padalecki, nun-y prestó nada enterase del proyeutu per Twitter, llevándolu a escribir unos mensaxes bastante ariscos.
