Película nueva de The Exorcist:
Vuelve’l ciclu de películes más nomaes sobre cures esconxuradores, y va ser de la mano de Blumhouse, la gran productora de cine d’horror d’esti sieglu. Dicen que va ser una continuación de pol estilu de les de Halloween, polo que ye probable qu’inoren lo asocedío nes demás secueles (y na serie de televisión) pa siguir direutamente dende la primera.
Principia’l rodaxe de The Last of Us:
La serie de HBO basada nos famosos videoxuegos yá ta en marcha, anque entovía dixeron bien poco no tocante a ella. Sabemos que Pedro Pascal y Bella Ramsey van ser los protagonistes (faciendo de los personaxes de Joel y Ellie), pero poco más. Espérase que salga na canal de streaming pal añu que vien.
L’espolín de Space Jam:
Llevamos unos díes nos que les redes sociales bullen cola polémica de Space Jam, que, por si nun vos enterastis, ye qu’a última hora atrasaron la estrena n’España pa que la cantante Lola Índigo doblara al castellán el personaxe de Lola Bunny. Ye un casu más de tantos nos qu’una productora quier más poner un famosu qu’un profesional (como pasó con Melendi, Mario Vaquerizo o Dani Martín, disculpándose esti últimu por cargase la película School of Rock) y, anque hai quien pidió esperar a ver el resultáu primero de criticar nada, yá salió un traile nel que podemos ver per onde va la cosa (pues velu equí).
