El mundu’l cómic escontra Vox:
N’apuntando la cuenta de Twitter de Vox pal editor de la revista El Jueves, ñaz el manifiestu Viñetas contra el Fascismo, que yá firmaron cientos de profesionales y nel que se posicionen escontra “el fascismu y quien aprovecha’l so espaciu nes instituciones pa semar odiu, llanzar amenaces y destruyir”, aseguren que van siguir creando “magar la represión, les denuncies y amenaces” y defenden que’l cómic ha ser un espaciu onde nun cueyan “discursos fascistes, machistes, racistes nin homófobos”.
Aporten precueles:
Y ye qu’anden tresnando unes cuantes. Per un llau, una de la película de mieu The Orphan, que si nun la vistis diba d’una pareya qu’afiaba una neña que nun yera lo que paecía. Yá tien guión, direutor y protagonista, que sorprendentemente va ser la mesma que na película de va yá más de diez años. Dicen que van usar un entemez de planos trucaos y CGI pa que siga paeciendo una neña. Per otrullau, Disney + anuncia que va sacar una serie sobre Gastón, el faltosu qu’anda tres de Guapa en The Beauty and the Beast, y el so amigu Le Fou, interpretaos polos mesmos actores que na versión última (que tenía a Emma Watson de protagonista). Ah, y la serie Star Trek: Strange New Worlds, que cunta hestories de la Enterprise unos añinos primero de llegar Kirk a la nave, yá tien la primer temporada rodada.
Silverhawks:
Les series clásiques de dibuxos tornen fuerte, y en viendo l’otru día’l traile de He-Man, agora lleguen noticies de que tienen pensao que vuelva otra más. Nun sabemos si recordaréis Silverhawks, pero foi un clásicu nos ochenta, na edá dorada de los dibuxos animaos de collaboración xaponés-americana (neto que Thundercats). Igual dicho asina nun vos suena, pero si sois millennials pueque l’abertura vos traya l’alcordanza (podéis vela equí).
Celsius 232 n’Avilés
No llocal, esta selmana a partir de mañana va desendolcase n’Avilés el Festival Celsius 232 que va cuntar cola participación de más d’un cientu d’autores d’Asturies, España, Europa y el restu’l mundu. El festival desendólcase dende’l martes 13 de Xunetu hasta’l sábadu 17 d’esti mesmu mes. L’accesu ye de baldre. Pues consultar tol programa nesti enllaz.
